د ایران د حکومت مشر علي خامنه ای دیکشنبې په ورځ خپلو ملاتړو ته په وینا کې له متحده ایالاتو سره مستقیمې خبرې رد کړې او پر هغو کسانو یې انتقاد وکړ چې د دواړو هیوادونو د اړیکو رغول غواړي .
د افغانستان ، سیمې او نړۍ مهم خبرونه
بنګله دیش او پاکستان، چې یو وخت په ۱۹۷۱ کال کې له جلا کېدو وروسته یې سخته دښمني سره درلوده ، د یکشنبې په ورځ موافقه وکړه چې خپلمینځي اړیکې چې د اوږدې مودې راهیسې کړکېچنې وې ورغوي او سوداګري زیاته کړي. خو بنګله دیش دا هم وویل چې یوه مهمه مسئله چې پاکستان باید د جګړې پر مهال د شویوظلمونو څخه بخښنه وغواړي لاینحل پاته ده . د پاکستان بهرنیو چارو وزیر اسحاق ډار چې په تیرو دیارلسو کلونو کې لومړی پاکستانی لوړ رتبه چارواکی دی چې دبنګله دیش لیدنه کوي وویل چې ددواړو هیوادونو د ولسونو د خیرښینګڼې لپاره ساحه او امکانات پراخ دي. Читать дальше...
د اوکراین ولسمشر ولودیمیر زیلینسکي د یاد هیواد د خپلواکۍ د ورځې په مناسبت وینا کې وویل چې د مسکو په وړاندې روانه جګړه به ونه بایلي. دا په داسې حال کې ده چې د جنګ په ډګر کې نويو پرمختګونو سره همهاله ددغې درې کلنې جګړې د پای ته رسولو لپاره ډیپلوماتیکو هلوځلو هم زور اخیستی دی.
د افغانستان کرکټ بورد، د اسیا جام شل اوریزه سیالیو لپاره چې ټاکل شوې د راتلونکې سپټمبر له ۹ مې تر ۲۸ نېتې په متحده عربي اماراتو کې ترسره شي، ملي لوبډله اعلان کړه. کرکټ بورډ نن یکشنبه د اګسټ په ۲۴ مه په خپله فیسبوک پاڼه په یوه اعلامیه کې ویلي، چې په غوره شوې شل کسیزه لوبډله کې ۱۷ اصلي او ۳ احتیاطي لوبغاړي شامل دي. د کرکټ بورډ ویاند سید نسیم سادات ازادي راډيو ته وویل چې په دې نوملړ کې د ملي لوبډلې د مرکزي قرارداد درلودونکو لوبغاړو تر څنګ یو شمېر نویو لوبغاړو ته چې په وروستیو کې په کورني کرکټ کې ښه ځلیدلي هم ځای ورکړل شوی دی. Читать дальше...
په داسې حال کې چې په پاکستان کې میشتو ۱ عشاریه ۴ میلیونه د " پي، او، ار" کارت درلودونکو افغان کډوالو ته له دې هیواده د وتلو لپاره د ورکړل شوی مهلت یوازې اووه ورځې پاتې دي، د طالبانو حکومت ویلي چې په وروستیو څو ورځو کې له دې هیواده د افغان کډوالو د ستنېدنې لړۍ یو وار بیا چټکه شوې ده. د کډوالو ستونزو ته د رسېدو په هدف د طالبانو د حکومت کمیسیون په یکشنبه ( د اګست ۲۴ مه) په خپله اېکس پاڼه لیکلي چې یوازې په تېرو دوه ورځو کې د اګسټ ۲۲ مه او ۲۳ مه د تورخم او سپین بولدک له لارې ۱۲۸۷ کورنۍ راستنې شوي چې د غړو شمېر یې ۶۵۰۰ تنو ته رسیږي. Читать дальше...
د پښتونخوا ملي عوامي ګوند غړو او پلویانو د بلوچستان په بېلابېلو پښتون مېشتو سیمو کې د خیبر پښتونخوا له سېلاب ځپلو سره د مرستې کیمپونه لګولي دي. هغو کیمپونو ته ځايي وګړي ورځي او تر خپلې وسې چنده ورکوي. د اګست پر ۱۴مه او ۱۵مه د خیبر پښتونخوا په یوشمېر ضلعو کې تر شړکنده بارانونو وروسته سېلابونو شاوخوا ۴۰۰ کسان ووژل او سلګونه کورونه یې زیانمن او ړنګ کړل. په همدې حال کې د خیبر پښتونخوا حکومت هم ویلي چې سېلاب ځپلو ضلعو ته مرستې لېږدولې دي او هلته یې ګرځنده کلېنېکونه او طبي کیمپونه جوړ کړي دي. ویډيويي رپورټ.
راشد خان به راتلونکې میاشت د اسیا د شل اوریزو لوبو جام کې د افغانستان د ټیم چې ځواکمن سپنران لري مشري وکړي. د دغه ټورنمنټ لپاره د ټیم په تشکیل کې چې د یکشنبې ورځ په اعلان شو نوی سپنر الله محمد غضنفر هم شامل دی. د کپټان راشد خان ترڅنګ تجربه لرونکي سپنران ، محمد نبي ، نور احمد او مجیب الرحمن هم دافغانستان ټیم ته ځواک او تجربه بښي. فضل الحق فاروقي ، عظمت الله عمرزی، نوین الحق او ګلبدین نایب د افغانستان په لوبډله کې د تیز بالینګ څلور انتخابونه دي. ابراهیم ځدراڼ ، رحمن الله ګربز ، صدیق الله اتل او کریم جنت دافغانستان بیټنګ لاین پیاوړی کوي. Читать дальше...
د روسیې دفاع وزارت د اوکراین په ختیز دونېڅک سیمه کې د جګړې لومړۍ کرښې ته نېږدې د دوو نورو مېشتځایونو د واک ترلاسه کولو دعوه کړې ده.وزارت دا خبره د اګست پر ۲۳مه پر داسې مهال کړې ده چې روسیو ځواکونو د جمعې او خالي (شنبې) ترمینځ شپې مهال پر اوکراین د بې پیلوټه الوتکو بل لوی برید وکړ. د دفاع وزارت ویلي، د تورېڅک ښار په شمال لویدیز کې یې د کلېبان – بېګ او د شمال ختیز خارکیف پولې ته نېږدې یې د سېرېدنې کلي نیولي دي. د دفاع وزارت تر دې یوه ورځ مخکې هم په دونېڅک سیمه کې د خپل ورو پرمختګ په دوام کې د درې کلیو د نیولو دعوه کړې وه. Читать дальше...
د افغانستان په یوولسو ختیځو ،شمال ختیځو او جنوبي ولایتونو کې نن د سختو بارانونو او ناڅاپي سیلابونو اټکل شوی دی. د طالبانو ترواک لاندې د ترانسپورت او هوايي چلند وزارت د هوا پیژندنې ریاست د معلوماتو له مخې په نورستان ، کنر، لغمان، کاپیسا، ننګرهار ، لوګر ، خوست، پکتیا ، پکتیکا ، غزني او میدان وردک ولایتونو کې د شدیدو بارانونو او سیلابونو د احتمال اټکل شوی دی. په ځینو یادو ولایتونو کې د تیرې اونۍ بارانونو او سیلابونو له امله ۴ کسه مړه او لسګونه کورونه ویجاړ یا زیانمن شول. دغه راز چارواکو د سلګونو جریبه... Читать дальше...
د خوست په شیخ زاید لوبغالي کې د والیبال دوه میاشتنۍ سیالۍ روانې دي چې پکې د خیبر پښتونخوا په ګډون د بېلابېلو سیمو ۱۰ لوبډلې برخه اخلي. د اګست پر ۱۹مه لسګونو کسانو د لوبو د پیل په مراسمو کې ګډون وکړ. د سیالیو جوړوونکي وايي لوبې ځوانان ژوند کولو ته تشویقوي. په خوست کې ځوانان د کرکټ ترڅنګ له والیبال او نورو لوبو سره هم علاقه لري او وخت په وخت هلته د بېلابېلو لوبو سیالۍ کېږي چې د افغانستان د بېلابېلو ولایتونو لوبډلې پکې برخه اخلي. نور حال په دې ویډيويي راپور کې وګورئ.
د طالبانو د پاسپورت ریاست اعلان کړی چې له دې وروسته درې ډلې کسانو ته پاسپورټ نه ورکوي. دغه ریاست پرون شنبه یوه خبرپاڼه کې دغه ډله کسان جزایي قضیه درلودونکي، بې سرپرسته ماشومان او ممنوع الخروج شوي افغانان یاد کړل. په افغانستان کې د طالبانو له واکمنۍ وروسته پاسپورت ته د خلکو غوښتنه زیاته شوې او د پاسپورټ ویش له لومړي سره له ډیرو ستونزو او کړاوونو سره مخامخ وو. له افغانستانه بهر بیا له څو محدودو قونسلګریو پرته په نورو کې لا هم نوي پاسپورټونه نه ویشل کیږي او افغانان د اړتیا لپاره خپل پخواني هغه د سټیکر په لګولو تمدیدوي. Читать дальше...
شمالي کوریا نن یکشنبه د هوایي دفاع دوه نوي توغندي و ازمایل. د فرانسې خبري اژانس لیکلي، دا ازموینه داسې مهال ترسره شوې چې د شمالي کوریا چارواکي جنوبي کوریا تورنوي چې پر پوله یې نانندرۍ زیاتې کړې دي. د جنوبي کوریا پوځ پرون وویل، دوی وروسته تر هغه پر پوله اخطاریه ډزې وکړې چې په وینا یې د شمالي کوریا پوله ساتي پر لانجمنې پولې د لنډې مودې لپاره ور اوښتي وو. د جنوبي کوریا یوه خبري اژانس ( (KCNA راپور ورکړی چې ننني ازمایل شوي توغندي د جګړې عالي وړتیا لري، خو نور جزییات یې نه دي ورکړي. شمالي کوریا سیمه کې... Читать дальше...
د امریکا د دفاع وزارت یا پنټاګون پلان لري چې شیکاګو کې د پوځ غړي ځای پر ځای کړي. دا ګام داسې مهال پورته کیږي چې ولسمشر ډونالډ ټرمپ غواړي په دغه ښار او شاوخوا سیمو کې یې جرمونه، بې کوره کسان او بې اسناده کډوال وځپي. رویټرز خبري اژانس د شنبې په ورځ ناوخته د واشنګټن پوست په حواله لیکلي چې په لومړي ګام کې ممکن د سپتمبر په لومړیو کې د ملي ګارد څو زره سرتیري شیکاګو ته واستول شي. په تیره جون میاشت کې په لاس انجلس کې د ناقانونه کډوالو د نیولو او هلته د پاریدلو مظاهرو د کنټرول لپاره هم یاد ښار ته د ملي ګارد... Читать дальше...
د ایران امنیتي ځواکونه وایي چې په نارامه سیستان-بلوچستان ولایت کې یې " اسراییل سره د تړلې یوه ترهګریزې ډلې" شپږ غړي وژلي دي. فرانس پریس پرون شنبه د ایرانا خبري اژانس په حواله ویلي چې دغه کسان له پولیسو سره د ډزو په تبادله کې وژل شوي، خو د پیښې کره ځای او وخت یې نه دی ذکر کړی. سیستان-بلوچستان چې له افغانستان او پاکستان سره ګډه پوله لري، وخت نا وخت د ایراني امنیتي ځواکونو او وسله والو ډلو او قاچاق وړونکو ترمنځ د بریدونو شاهد وي. خبر کې راغلي چې وژل شوي ترهګر بهرني اتباع دي، خو هویت یې نه دی څرګند شوی. Читать дальше...
د بریتانیا د کورنیو چارو وزیره ایوېت کوپر وایي، د هغو کسانو د اخراج لړۍ چټکوي چې دغه هېواد کې یې د پنا غوښتنې رد شوې دي. د جرمني خبري اژانس ( ډي.پې.اې) د شنبې په ورځ ناوخته د نوموړې په حواله ویلي چې د پناغوښتونکو د قضیو د بیا کتنې اوسنی سیستم له پخوا نه ورته په میراث پاته دی او دې ته د منلو وړ نه دی. دا مهال د افغانانو په ګډون شاوخوا ۵۱ زره کسان بریتانیا کې میشت دي چې د پنا لومړنۍ غوښتنې یې رد شوي او اوس بیا ارزونې ته په تمه دي. خبر کې راغلي چې دا ګام د پناغوښتنې په بهیر کې د بریتانیا د پام وړ فشارونه ښيي. Читать дальше...
جرمني یو ځل بیا د افغانانو د منلو په اړه له خپلې سختې پالیسۍ دفاع کړې ده. د جرمني رسنیو د راپورونو له مخې، د دغه هېواد د کورنیو چارو وزیر د افغان کډوالو د بیا مېشتېدو د دوسیو د څېړلو د بهیر د چټکولو غوښتنه رد کړې ده. نوموړي زیاته کړې چې د دوسیو دقیق څېړل وخت ته اړتیا لري.
