یوغور مسلمانانو د جون پر ۱۷مه د چین د شېنجیانګ (سېنکیانګ) ولایت په ګلجا سیمه کې د لوی اختر کلنۍ مېله کړې چې هغوی ورته د "قربان جشن" وايي. په هغه مېله کې یوغوریان فرهنګي نڅا کوي او فولکلوري سندرې وايي. په چین کې مېشت یوغور مسلمانان له خپلې عقیدې او دودونو سره سم په بشپړه ازادۍ ژوند نه شي کولای او د حکومت تر څار لاندې وي. د اسوشیېټېډ پرېس اژانس له ویډیو جوړ رپورټ.
د خیبر پښتونخوا په خیبر ضلع کې ګڼو خبریالانو او فعالانو د خپل یو ملګري د وژنې ضد مظاهره کړې ده. د جون ۱۹مې احتجاج ګډونوالو له حکومته د خلیل جبران اپرېدي په وژنه کې د ککړو کسانو د نیولو او د خبریالانو د خوندیتوب غوښتنه کوله. د اپرېدي په جنازه کې ګڼو خلکو ګډون وکړ. پولیس وايي، اپرېدی د جون ۱۸مې پر ماخوستن په لواړګي کې د وسلوالو په برید کې ووژل شو او بل ملګری یې ژوبل شو. د خیبر نیوز ټېلېوېژن د هغه خبریال د وژنې ذمه واري چا نه ده منلې. ویډیويي رپورټ.
د پاکستان په خیبرپښتونخوا کې سلګونه کسانو د چهارشنبې په ورځ د جوزا ۳۰مه د وژل شوي خبریال خلیل اپریدي د جنازې او خارو ته د سپارلو په مراسمو کې ګډون وکړ. تر دې دمه د وژنې مسوولیت چا په غاړه نه دی اخیستی، خو د اپریدي کورنۍ وايي، دی ګواښل شوی و. ګډونوالو د خبریالانو د ساتنې لپاره د ډېرو هڅو غوښتنه وکړه.
منیژه تلاش به سږ کال د پاریس په المپيک سیالیو کې د برېکډانس برخه کې ګډون کوي، خو د افغانستان استازیتوب نه کوي. هغه د المپیک کډوالو لوبډله کې شامله شوې ده. په افغانستان کې طالبان اجازه نه ورکوي څو ښځې سپورټي فعالیتونو کې برخه واخلي. د برېکډانس رشته د لومړي ځل لپاره د المپیکي سیالیو برخه ګرځېدلې.
د دې اوونۍ د مشال تر رڼا لاندې کې د بلوچستان او خيبر پښتونخوا حکومتونو د لومړيو څو مياشتو کارکردګي بحث شوې ده.
د پاکستان تر واک لاندې په ګلګت بلتستان کې د قراقرم غره سپانټک څوکې ته د ختلو پر مهال له ورکو شویو دوو جاپانیانو څخه یې د یو مړی موندل شوی دی. چارواکي وايي، د سختې واورې ورېدو او خراب موسم له وجې یې د دویم غرختونکي په اړه معلومات ترلاسه نه کړای شول او د هغه د موندلو عملیات یې درولي دي. د رویټرز اژانس له ویډیوګانو جوړ رپورټ.
په داسې حال کې چې په افغانستان کې د نجونو پر زده کړو د طالبانو د حکومت بندیز ۱،۰۰۰ ورځې پوره شوې دي، ۲۱ کلنه منیزه تالاش د برېکډانسېنګ په نوم د ځانګړې نڅا په سیالیو کې د ګډون تیاری کوي. د اولمپېک نړیوالې کمېټۍ په وروستیو کې هغه نڅا د یو ورزش په توګه وپېژنده او په لومړي ځل یې د پاریس په سیالیو کې شامله کړه. تالاش د ډېریو نورو افغانانو په څېر په ۲۰۲۱ز کال کې د طالبانو له واکمنېدو راهیسې له هېواده تللې او اوس په هسپانیا کې اوسي. هغه به پاریس کې په اولمپېک سیالیو کې د کډوالو په لوبډله کې شامله وي. د رویټرز اژانس له ویډیو جوړ رپورټ.
