د خوست په ترېزیو کې د ځايي ولسي مشرانو په مینځګړتوب د دوو کورنیو ترمینځ ۱۷ کلنه دښمني په دوستۍ بدله شوې ده. سوله کوونکو وویل چې د دښمنۍ پر مهال یې نه یوازې د کورنیو غړو ته مرګژوبله اوښتې، بلکې د ماشومانو د زده کړو په ګډون یې د ژوند نورې چارې هم زښتې اغېزمنې شوې وې. دوی له خلکو وغوښتل چې خپلې لانجې دې په خبرو هوارې کړي. په خوست کې له یوې مودې راهیسې د جرګو له لارې د کلونو پخوانیو دښمنیو ختمولو سلسله روانه ده. ویډیويي رپورټ.
د دې اوونۍ د مشال تر رڼا لاندې کې په پاکستان کې د انټرنېټ ورووالي لاملونه، پر ورځني ژوند او کاروبارونو يې اغېز بحث شوی دی.
په ایران کې د پاکستانیو شیعه زایرینو بس چپه شوی چې پکې لسګونه کسانو ته مرګژوبله اوښتې ده. چارواکي وايي چې پېښه د اګست ۲۰مې او ۲۱مې ترمینځ شپې مهال په مرکزي ولایت یزد کې شوې ده او هغه بس عراق ته روان وو. د پاکستان ولسمشر اصف علي زرداري د بهرنیو چارو وزارت ته لارښوونه کړې چې مړي هېواد ته ولېږدوي او له ژوبلو سره پر وخت مرسته وکړي. هر کال مېلیونونه شیعه ګان د زیارت او دیني مراسمو لپاره عراق ته ځي. د اسوشيېټېډ پرېس اژانس له ویډیو جوړ رپورټ.
د پښين د برښور سيمې په يوه کلي کې د ماشومو نجونو يو داسې سرکاري سکول شته چې خپله ودانۍ نه لري او له تېرو ۲۴ کلونو راهيسې يوه ښوونکې په يوه شخصي خونه کې زده کوونکو ته درس ورکوي. د پوټي عيسازي کلي دغه ښوونځي ته له درو کليو ماشومې نجونې له لومړي تر پينځم ټولګي پورې د دزدکړو لپاره ورځي چې هېڅ ډول بنيادي اسانتياوې نه لري. د پوهنې ځايي چارواکي وايي چې ودانۍ نه لرونکو ښوونځيو ته يې د خېمو ورکول پيل کړي دي. ويډيو رپورټ
