Новости за 15.08.2024

په افغانستان کې د طالبانو په درې کلنه واکمنۍ کې هنرمندان په تر ټولو ډېرو ځپلو شويو کې شمېرل کېږي. طالبانو پر موسیقۍ د بندیز په لګولو زرګونه هنرمندان بې روزګاره کړي او د موسیقۍ ګڼ الات یې سوځولي دي. لږ تر لږه سلګونه افغان هنرمندان د سر ساتلو لپاره نورو هېوادونو ته کډه شوي دي. ځينې یې چې لا هم په افغانستان کې پاتې دي، بې روزګاره دي او په وېره او بې وزلۍ کې ژوند کوي. په دوی کې یو هم د افغانستان د ملي‌ ارکېسټرا غړی وحيد نېکزاد لوګری دی چې وايي، موسیقي ټوپک نه دی چې خلک وژني بلکې د خوشالۍ وسیله ده نو ځکه باید بندیز ورباندې و نه لګول شي. Читать дальше...

د پښتون ژغورنې غورځنګ (پي ټي اېم) مشر منظور پشتین د جمعیت علمای اسلام (ف) له مشر مولانا فضل الرحمان سره لیدلي دي. د جمعیت مطبوعاتي څانګې د اګست پر ۱۵مه د مشال راډیو په ګډون رسنیو ته په استولي بیان کې ویلي دي چې پشتین له خپل پلاوي سره په اسلام اباد کې د مولانا فضل الرحمان کور ته ورغی. بیان وايي، دواړو مشرانو په خیبر پښتونخوا، په ځانګړي ډول، په قبایلي ضلعو کې پر ناامنۍ اندېښنه وښوده. پي ټي اېم هم ویلي دي چې پشتین د ناامنۍ او د پښتنو د مسلو په اړه د اکتوبر پر ۱۱مه د پراخې ملي غونډې د تیاري په لړ کې د جمعیت له مشر سره لیدلي دي. Читать дальше...

اوکراینيو ځواکونو د روسیې په کورسک سیمه کې پرمختګ ته دوام ورکړی او ورسره روسیو چارواکو له نېږدې بېلګورود سیمې څخه شا و خوا ۲۰۰،۰۰۰ خلک ايستلي دي. د اوکراين پوځ مشر وايي چې د کورسک ۴۰ مربع کېلوميټره اضافي ځمکه يې نيولې ده. ويډيو رپورټ

"جرګې" د سولې د هغو ۱۰ سندرو له ټولګې څخه ده چې د مشال راډیو په مالي او تخنیکي مرسته تیاره شوې ده. تاسې کولای شئ چې دا ویډیويي سندره وګورئ او له ملګرو سره یې شریکه کړئ. سندرغاړی: عزت ګل، شاعر: بارکوال میاخېل او کمپوز: هارون باچا

واک ته له رسیدو وروسته طالبانو داسې فرمانونه صادر کړل چې پر ښځو یې دوامداره بندیزونه ولګول. په دې لړۍ کې د هغو بندیزونو ځینې بېلګې وینئ.

د پوځ د عامه اړیکو دفتر (ای اېس پي ار) د اګست پر ۱۵مه په لنډ بیان کې ویلي دي چې هغه درې پخواني افسران د داسې "کړنو پر اساس نیولي چې د پوځي ضابطې خلاف" ول.

د بلوچستان په پښتون مېشته سیمه چمن کې ځايي خلکو، پنډیانو او سوداګرو د کندهار له سپین بولدک سره د سفري اسانتیاوو لپاره لاریون کړی دی. د اګست ۱۴مې د لاریون ګډونوالو په لاسونو کې تور بیرغونه نیولي ول، د چمن د انتظامي مشر (ډېپټي کمېشنر) تر دفتره ورغلل او هلته یې خپلې غوښتنې تکرار کړې. د لاریون مشران وايي چې حکومت د کندهار له سپین بولدک سره بې له سفري اسنادو د خلکو تګ راتګ له ژمنې په شا شوی دی. په چمن کې نهه میاشتینۍ احتجاجي ناسته د جولای پر ۲۱مه تر هغې وروسته ختمه شوه چې د پرلت غړو او مشرانو وویل چې... Читать дальше...

داعش پر طالبانو تور پورې کوي چې د "جهاد" لاره یې پرېښې ده او د مرستې او په هېواد کې د پانګونې لپاره یې د هغو بهرنیو هېوادونو مخې ته سر ټیټ کړی دی چې په یو وخت کې یې پرضد جنګېدل.

دری کاله وړاندې د ۲۰۲۱م کال د اګست په ۱۵مه د طالبانو ځواکونه کابل ته ننوتل او د محمد اشرف غني په مشرۍ حکومت ړنګ شو. غني او د هغه د کابینې نږدې ټول غړي له کابله ووتل او ارګ د طالبانو لاس ته ولوېد. طالبان تر اوسه پورې افغانستان د سرپرست حکومت په توګه اداره کوي او هېڅ هېواد یې په رسمیت نه پېژني.

محمد جواد د افغانستان په ملي اردو کې د خدمت پر مهال د طالبانو پر وړاندې په جګړه کې ژوندی پاتې شو، خو کله چې دغه وسله‌واله ډله په ۲۰۲۱م کال کې واک ته ورسېده، هغه وتښتول شو او تر شکنجې لاندې ووژل شو. د بشري حقونو ډلو د سلګونو نورو پوځیانو د هدفي وژنو، ورکېدلو او غیرقانوني نیولو اسناد ثبت کړي دي.