نن په روغتیا او درملنه خپرونه کې د هاضمې د نظام پر التهاب (سوزش)، چې په طبي اصطلاح ګیسټرواېنټرایټېس بلل کېږي، غږېدلي یو. روغتیاپالان وايي چې د دې ناروغۍ لامل خاص ډول وایرس یا بیکټېریا وي. دوی وايي چې د هاضمې د نظام وایرسي سوزش یا پړسوب مشخصه درملنه نه لري او خپله ښه کېږي، خو د بیکټېریايي هغه علاج اړین وي. نن د دې ناروغۍ په اړه نور معلومات هم درکوو. خپرونه د غږ په کړکۍ کې واورئ.
راپورونه وايي، د دوشنبې په ورځ په تورخم کې د طالبانو او پاکستانیو ځواکونو ترمنځ نښته شوې ده. تراوسه هېڅ لوري د دې نښتې په اړه څه نه دي ویلي. تر دې مخکې دواړو لوریو څو ځله د ډیورنډ کرښې په بېلابېلو سیمو کې نښتې کړي چې ځاني او مالي زیانونه یې درلودل.
د امریکا په کیلېفورنیا کې د ښځو لپاره یو ځانګړي مرکز دا نوښت کړی دی چې هلته ورتلونکې له سپیو سره یوځای یوګا کوي. یوګا د بدني، ذهني او نفسیاتي یا رواني ورزشونو مجموعه ده چې د رواني ناروغیو یو ډول علاج هم بلل کېږي. هغه مرکز ته ورغلې ښځې وايي، په نورو ځایونو کې به یې په یوګا کولو زړه تنګېده خو هلته ډېر ښه احساسوي. د رویټرز اژانس له ویډیو جوړ رپورټ.
په خوست کې د "معارف جام" تر سرلیک لاندې د ښوونځیو او مدرسو د زده کوونکو ۳۰ لوبډلو ترمینځ سیالۍ پای ته رسېدلې دي. د سیالیو منتظمین وايي چې له دې لوبو یې موخه د ښوونځیو او مدرسو ترمینځ واټن ختمول او زده کوونکي د عصري او دیني علومو مطالعې ته هڅول دي. ویډیويي رپورټ.
په پاکستان او ځانګړی توګه خیبر پښتونخوا او بلوچستان کې د کمپیوټري خواندګۍ یا سواد په میدان کې ډیر کار نه دی شوی او وخت په وخت پر انټرنېټ بندیزونو د ځوان کهول تعلیمي او کاروباري هلې ځلې اغېزمنې کړېدي.
د پاکستان په بېلابېلو ښارونو کې مذهبي لږکيو د اګست پر يوولسمه خپله ملي ورځ په احتجاجونو او غونډو ولمانځله. د دغو احتجاجونو ګډونوالو عیسیایانو، سیکانو او هندوانو وويل چې نه دوی او نه یې عبادتخانې محفوظې دي. دوی له حکومته غوښتنه وکړه چې مسایل دې یې حل او بنیادي بشري حقونه دې ورکړل شي. د پاکستان ولسمشر اصف علي زداري او وزیراعظم شهباز شريف د دې ورځې په مناسبت خپرو کړيو بیانونو کې لږکيوو ته د مرستې ډاډ ورکړی دی. په دې اړه د نیاز علي ويډيو راپور وګورئ.
