Новости за 13.05.2024

Чаллы риелторлар гильдиясенең 50дән артык белгече «Акча, эмоция, энергия һәм нәтиҗә» дигән мастер-класста катнашты. Аны Санкт-Петербургтан тәҗрибәле бизнес-тренер Алексей Гусев алып барды. Бу хакта «Шәһри Чаллы» сайтында Айзирә Имамова яза.

Бүген Габдулла Кариев исемендәгет татар дәүләт яшь тамашачы театрында «Татар кызчыгы, татар малае» бәйгесенә йомгак ясалды.

Уфа шәһәренә нигез салынуга 450 ел тулу уңаеннан 2024 елның 16-23 маенда Башкортстан Республикасы башкаласында «Туганлык» Халыкара милли театрлар фестивале – иҗат, бердәмлек һәм игелек энергиясе булган театр бәйрәме узачак. Бу хакта «Башинформ» мәгълүмат агентлыгы хәбәр итә.

Дәүләт Думасы депутатлары пленар утырышта Денис Мантуровны РФ Хөкүмәте Рәисенең беренче урынбасары вазифасына билгеләүне хуплады. Бу хакта Россия парламентының түбән палатасы сайтында хәбәр ителә.

Бүген Барда авылына Муса Җәлил бюсты җибәрелгән. Бу хакта Бөтендөнья татар конгрессы хәбәр итә.

Тукай премиясе лауреаты, сәнгать белгече, шагыйрә Розалина Шаһиева вафат. Мәгълүматны Татарстан Язучылар берлеге рәисе урынбасары Илсөяр Иксанова раслады. Розалина Шаһиевага 78 яшь иде.

Россия Президенты Владимир Путин бүген Иминлек советы даими әгъзалары белән киңәшмә үткәрде. Очрашуда Иминлек советының яңа секретаре Сергей Шойгу катнашты.

Мәскәүдә башкала Сабантуен әзерләү һәм үткәрү буенча быел беренче киңәйтелгән киңәшмә үткәрелде. Оештыру комитеты очрашуы төп татар милли бәйрәмнәренең берсе булган Сабантуй традицион рәвештә үтә торган «Коломенское» музей-тыюлыгы территориясендә узды. Очрашуда Чаллы делегациясе катнашты. Бу хакта Татарстан Республикасының Россия Федерациясендәге Тулы вәкаләтле вәкиллеге хәбәр итә.

Татарстанда «Бердәм Россия» алдан тавыш бирүендә катнашу өчен 343 кеше теркәлгән. Кандидатлар исемлеген бүген партиянең Татарстан төбәк бүлекчәсе оештыру комитеты раслады, дип хәбәр ителә «Бердәм Россия» Бөтенроссия сәяси партиясенең Татарстан төбәк бүлеге сайтында.

X юбилей Казан марафонында 28 мең кеше катнашкан. Катнашучыларның саны да, географиясе дә елдан-ел арта, дип билгеләп үтә мэр Илсур Метшин башкарма комитетның эшлекле дүшәмбесендә.

Татарстан Республикасы Рәисе Рөстәм Миңнеханов Бөтендөнья этноспорт конфедерациясе президенты Нәҗметдин Билал Эрдоган белән очрашты. Эрдоган эш сәфәре белән безнең илдә. Очрашу барышында яклар спорт өлкәсендә алга таба хезмәттәшлек итү, булган элемтәләрне ныгыту һәм халыкара спорт ярышларында катнашу турында фикер алышты, дип хәбәр итә республика җитәкчесенең матбугат хезмәте.

«Казан» агросәнәгать паркында 14 майда «Россия — Ислам дөньясы: KazanForum 2024» XV Халыкара икътисади форум кысаларында Kazan Halal Market халыкара хәләл продукция ярминкәсе ачылачак. Анда бөтен дөньядан 4,5 меңнән артык төрле товар тәкъдим ителәчәк.

Бөтендөнья этноспорт конфедерациясе эгидасы астында үткәрелә торган халыкара фестивальне 2025 елда Казанда уздырырга планлаштыралар. Бу планнар турында Бөтендөнья этноспорт конфедерациясе президенты Нәҗметдин Билал Эрдоган Татарстан Республикасы Рәисе Рөстәм Миңнеханов белән очрашуда хәбәр итте.

«Яңа исем» лабораториясенең 2 нче сезонына старт бирелә. Каләм тибрәтүче яшьләр өчен берничә ай дәвамында остазлар белән турыдан-туры элемтәдә булып, өр-яңа әсәр иҗат итү, язу осталыгын чарлау, онлайн дәресләр, туры эфирлар, язучы остаханәсе, мастер-класслар, шигырь кичәләре, фатирниклар узачак.

«Алтын каләм» республика яшүсмерләр һәм яшьләр матбугаты фестиваленең жюри рәисе, ТР Дәүләт Советы депутаты Римма Ратникова журналистика һөнәрен стресслы һәм көндәшлек зур булган профессия дип бәяләде. «Безнең һөнәрдә матур мизгелләр күп, ләкин ул эчтән башкачарак», – дип сөйләде ул «Татар-информ»да узган «Алтын каләм» фестивале финалистлары белән очрашуда.

«Алтын каләм» Республика яшүсмерләр һәм яшьләр матбугаты фестиваленә быел ике яңа номинация өстәлгән. Номинацияләрдә җиңүчеләр 1 миллион сумга ия булачак. Бу хакта «Татар-информ»да узган матбугат очрашуында ТР Яшьләр эшләре министры Ринат Садыйков әйтте.

2024 елның 14 маенда «Россия – Ислам дөньясы: KazanForum 2024» халыкара икътисади форумы кысаларында Казанның Агросәнәгать паркында Халыкара Kazan Halal Market хәләл продукция ярминкәсе ачыла. Ярминкә дистәләгән яңа брендка үзләрен күрсәтергә мөмкинлек бирә. Әлеге мәйдан – азык-төлек, косметика, кием, атрибутика, аксессуарлар һәм йорт өчен товарлар сату өчен ачык.

«Алтын каләм» республика яшүсмерләр һәм яшьләр матбугаты фестивале быел беренче тапкыр берничә ай дәвамында үткәрелә. Фестивальнең финалына үткән 72 укучы Казанга җыелды. Июньдә узачак финалда Гран-прига ия өч укучы билгеле булачак. «Татар-информ»да узган матбугат очрашуында фестивальнең быелгы яңалыклары белән таныштырып, укучыларның сорауларына җавап бирделәр.

Сишәмбе, 13 майда, Казанда һава температурасы -1,6 градуска кадәр төште. Бу хакта Казан-Аэропорт авиация метеостанциясе мәгълүматларына сылтама белән Татарстан Республикасы Гидрометеорология үзәге хәбәр итә.

Дүшәмбе, 13 майда, «КАМАЗ» генераль директоры Сергей Когогин һәм Мәскәү мэры Сергей Собянин «Москвич» автозаводында тулы цикл технологиясе буенча автомобильләр җитештерүгә старт биргән. Бу хакта Татарстан предприятиесе матбугат хезмәтендә хәбәр иттеләр.

«Дулкын» татар мәдәнияте үзәге» Алтай крае җәмәгать оешмасы В. Я. Шишков исемендәге Алтай крае универсаль фәнни китапханәсе белән берлектә «Габдулла Тукай – татар шигъриятенең кояшы» әдәби программасын үткәргән. Бу хакта Бөтендөнья татар конгрессы хәбәр итә.

Махсус хәрби операция катнашучыларының 7 яшьтән 15 яшькә кадәрге балалары Мәскәү янындагы Наро-Фоминскидагы «Литвиново» лагеренә 3 мең бушлай юллама алачак, дип хәбәр иткәннәр Мәскәү өлкәсе губернаторы һәм хөкүмәтенең матбугат хезмәтендә. Бу хакта «РИА Новости» яза.

Татарстан Республикасының Даими вәкиллегендә «Питер Татар» мәгълүмат порталының 5 еллык юбилеен билгеләп үткәннәр. Бу хакта Татарстан Республикасының Санкт-Петербург шәһәре һәм Ленинград өлкәсендәге Даими вәкиллеге хәбәр итә.

Татарстанда тренер- укытучыларның хезмәт хакына төрле өстәмәләр керттеләр. Бу карарга Татарстан Премьер-министры Алексей Песошин кул куйды.

Дәүләт Думасы вице-премьер вазифасын башкаручы - сәнәгать һәм сәүдә министрлыгы җитәкчесе Денис Мантуровны Россия хөкүмәте башлыгының беренче урынбасары вазифасына раслау турындагы мәсьәләне карый. Бу хакта палата спикеры Вячеслав Володин белдерде.