Москвадагы "Крокус Сити" борборунда 130дан ашык адамдын өмүрүн алган кол салуудан кийин Орусияда чет өлкөлүк жарандарды текшерүү күчөгөнү, Кыргызстандан учуп барган мигранттар тобу эки күндөн бери аэропортто кармалып турганы кабарланды.
Кыргыз бийлиги издөөдө жүргөн мурдагы бажычы Райымбек Матраимов Бакуда экени аныкталганын билдирди.
Парламенттин мурдагы депутаты, коомдук ишмер Ишенбай Кадырбеков 24-марттын сабактары, окуянын келип чыгышы, андан кийинки саясий процесстер тууралуу "Азаттыкка" маек курду.
23-мартта орус медиасы Москванын чегиндеги "Крокус Сити Холлго" болгон кол салууда 100дөн ашуун адамды аман-эсен куткарып калган өспүрүм тууралуу жазды. "Азаттыктын" ишенимдүү булагы ал өспүрүм 15 жаштагы кыргызстандык Ислам Халилов экенин ырастап, каргашалуу окуя тууралуу айтып берди.
Ысык-Көлдүн Каракол шаарынын жолдору толук оңдолуп бүтүп калды. Жаңы салынган жолдун четине бетон арык жасалган. Тургундар борбордук көчөлөрдүн бириндеги бул лотоктордун кар менен кошо эрип, үбөлөнүп бузулуп жатканына нааразы болууда. Маалыматка караганда лотоктун ар бири 2760 сомдон сатып алынган, жалпысынан 3 миллион сомдон ашык кеткен. Шаар бийлиги курулуштун сапаты боюнча иликтөө жүрүп жатканын билдирди.
