13-мартта Кыргызстанда жана дүйнөдө эмне болду? “Азаттык” күндүн башкы жаңылыктарын тизмектейт.
Медиа чөйрөнүн жана укук коргоочулардын сынына кабылган "Жалпыга маалымдоо каражаттары жөнүндө" мыйзам долбоорун президент артка кайтарып, аны толуктап иштеп чыгууну тапшырды.
Кемпир-Абад иши боюнча Бишкектин Биринчи Май райондук сотундагы бүгүнкү отурумга адвокат Акин Токталиев Адвокатуранын катынын негизинде киргизилген жок. Отурумда камалгандар айыптоо актысы адвокаттын жоктугуна карабай окулганына нааразылык билдиришти.
Депутат Шайлообек Атазов парламентте билдирүү жасап, мандатын алуу аракетине башкы прокурор Курманкул Зулушевди айыптады. Ал спикер Шакиевди да сындады. Ушул эле күнү дагы бир депутат Айбек Осмонов мандатын тапшырды.
1916-жылы Үркүндө Кытайга жер оодарып кеткен кыргыздардын баскан жолу картага түшүрүлдү.
Тил — улуттун улуттугун аныктаган маанилүү критерийлердин бири. Мамлекеттик тил Кыргызстанда өнүгүп жатабы, балдар эмнеге кыргызча сүйлөбөйт, тил саясаты эмнеге таянат? "Азаттыктын" талкуусуна “Биздин Мурас” коомдук фондунун жетекчиси Чоробек Сааданбек жана саясат талдоочу Руслан Акматбек катышты.
