Новости за 30.12.2018

Беларусин президенто Лукашенко Александара шен бешахь кхиийна 4 гали картолаш а, ткъа иштта дума а бахьийтина Путин Владимирна керлачу шарца декъал веш.   Цунах лаьцна хаам бина Лукашенкон зорбанан секретаро Эйсмонт Натальяс. Цо дийцарехь, юьйцурш ю тоьлла дикалла йолу картолаш.  ХIора гали чохь ша-тайпа картолаш ю, тайп-тайпана кхача кечбеш лелор Iалашонца кхиийна йолу. Йозуш йоцучу Пачхьалкхаийн ДоттагIаллана (СНГ) юкъахь йолчу кхечу пачхьалкхийн лидершна Лукашенкос совгӀатна яхьийтина куьйга йина базан диттана тIеухку ловзо хӀуманаш. Читать дальше...

2018-чу шарахь 386-зза цIе яьлла меттиг нисйелла Нохчийчохь. Цу бохамашкахь цIеяйархойн аьтто баьлла 344 стаг кIелхьарваккха. Динчу зен барам бу 96 миллион сом. Цунах лаьцна хаам бина Оьрсийчоьнан орцаллан министраллан Нохчийчуьрчу коьртачу урхаллан хьаькамо Яхьяев Руслана, яздо "Нохчийчоь тахана" сайто. Уггаре дукха цIе яьлла меттигаш нисбелла адамаш дехачу хIусамашкахь. ЦIе яларан коьрта бахьанаш ду Нохчийчохь лар ца луш цIе лелор а, газ ягон пеш оьшучу кепехь ца лелор а, тоькан гIирс галбалар а.

Бурятин коьртачу гIалан Улан-Удэн йистехь ГIуран-беттан 30-чу Iуьйранна охьадоьжна беркема. Велла цу тIехь хилла 4 стаг. Цхьаболчу хаамашца, царах цхьаъ ву цу кеманан долахо, Бурятехь вевзаш волу совдегар Рогов Сергей. Транспортан прокуратуро чIагIдарехь, беркема доьхна охьахууш Улан-Удэн йистехь Iуьллучу Лакхара Березовка эвлахь. Цхьана версица, иза дохаран бахьана чолхе хенахIоттаман хьелаш хилар ду. Сибирь.Реалиино яздарехь, беркема охьадоьжна садоIучу базан кертахь. Охьакхеттачул тIаьхьа цунах цIе летта.

ГIуран-беттан 31-гIа де йочанаш йоцуш догIур ду Соьлж-ГIалахь а, цунна гонаха йолчу кIошташкахь а. ХенахIоттаман говзанчаша бинчу хаамца, Нохчийчоьнан коьртачу гIалахь 31-хь дийнахь +1, -1 градус температура хир ю. Буьйсанна хIаваъ шел лур ду - 4 градусе кхаччалц. Де кхоьлина хир ду, наггахь стигал жимма серла а долуш.   Кхин дукха хийцабелла хир бац хенахIоттам 2019-чу шеран 1-чу дийнахь.