Татар дәүләт яшь тамашачы театры Кариевның 140 еллыгына чаралар программасын тәкъдим итте
Татар режиссеры һәм актеры Габдулла Кариевның тууына 140 ел тулган елда аның исемен йөртүче Казан Татар дәүләт яшь тамашачы театры яңа спектакльнең премьерасын, һәйкәл ачылышын, балалар иҗат конкурсын һәм башка бәйрәм чаралары әзерли. Театр хезмәткәрләре «Татар-информ»да узган матбугат конференциясендә болар хакында җентекләбрәк сөйләделәр.
Күркәм гадәткә кергәнчә, төп вакыйгалар 8 майда (Иске стиль буенча Габдулла Кариевның туган көнендә) узачак. Казанда режиссер җирләнгән Яңа Татар зиратында 10:00 сәгатьтә чәчәкләр салу тантанасы була. Нурлат шәһәрендә Кариев һәйкәле янында да шундый ук тантана узачак, ул 14:00 сәгатьтә башлана.
Нурлат Мәдәният сараенда Кариевның юбилеена багышланган программа 15:00 сәгатьтә башлана, ул режиссерга багышланган күргәзмә ачылышын һәм Татар дәүләт яшь тамашачы театрында режиссер Эльдар Гатауллин сәхнәләштергән «Габдулла – яктылык» спектакленең премьерасын үз эченә ала. Казанда спектакльне 20 майда күрсәтәчәкләр.
Нурлат районының Колбай-Мораса авылында (режиссер шушы авылда туган) татар театр эшлеклесе бюстына чәчәкләр салу һәм Габдулла Кариев исемендәге музей белән танышу да шулай ук 8 май көнне 18:00 сәгатькә билгеләнгән.
«Габдулла Кариев белән бәйле тагын бер зур хыялыбыз бар, ул да булса – Казанда аңа һәйкәл кую», – диде Татар дәүләт яшь тамашачы театры Илнур Гайниев.
Һәйкәлнең эскиз проектларына иҗади конкурс 1 апрельдә игълан ителде. Аның нәтиҗәләре 12 майдан соң билгеле булачак. Театр релизы нигезендә, һәйкәл кую агымдагы елның августыннан ноябрь аена кадәр планлаштырылган, әмма конкрет сроклар һәм даталар турында әлегә сөйләргә иртәрәк.
Быел Кариев театрында шулай ук Габдулла Кариевның 140 еллыгына багышланган балалар иҗат конкурсы уздыру планлаштырыла.
2026 елда җәмәгатьчелек истәлекле датаны – күренекле режиссер һәм актер Габдулла Кариевның тууына 140 ел тулуны билгеләп үтә. Үзенең кыска гына гомерен ул тулысынча татар халкының мәдәниятен, сәнгатен үстерүгә багышлаган һәм милли театрга нигез салучы буларак дан казанган.