(Казан, 26 март, «Татар-информ»). 1 апрельдән 4 апрельгә кадәр Татарстан Милли музеенда «Бүләк ясау көннәре» була. Теләге булган һәркем музейга сирәк предметлар бүләк итә ала. Акция ел саен ТР Милли музееның туган көнендә уздырыла.
Быел «Бүләк ясау көннәре» Татарстанда игълан ителгән Туган телләр һәм халыклар бердәмлеге елы кысаларында уздырыла, дип хәбәр итте Казан мэриясе.
Татарстанның мәдәният һәм фән эшлеклеләренең шәхси әйберләрен, фотосурәтләрен һәм китапларын, ХІХ-ХХ гасырда яшәгән халыкларның милли бәйрәмнәренә, гореф-гадәтләренә багышланган фоторәсемнәрен кабул ителә.
Шулай ук музейда татарлар, руслар, марилар, чувашлар, мордвалар һәм биредәге башка халык вәкилләре киеп йөргән XIX гасыр ахыры-XX гасыр башындагы традицион кием-салым элементлары һәм костюмнар, көнкүреш әйберләре (керамик савыт-саба, комган) кабул ителә.
Музей өчен кыйммәтле эш кораллары — үрелгән тырма, балык тоту кораллары, токарь пычак станогы, балчыктан ясалган кул яки пычак станогы, чылбырлар, тимерчелек яки куак эше ураклары кыйммәтле санала.
Фонд өчен шулай ук XIX–XX гасыр ахыры-XX гасыр башындагы йорт кул эшләре үрнәкләре, ХІХ гасыр башындагы һәм ХХ гасыр уртасындагы зәркән бизәнү әйберләре (чулпы, йөзек, алка, брошкалар, беләзекләр), заманча декоратив-гамәли сәнгать осталары эшләнмәләре дә кызыклы.
1920-1940 елларда туган як территориясендә яшәүче халык телләрендәге элмә такталар, плакатлар да тапшырып була.
5 апрельдә, ТР Милли музееның 126 еллыгы көнендә, акциягә йомгак ясалачак, дип хәбәр итә музейның матбугат хезмәте.
