Рӯзи 9-уми апрел дар шаҳри Душанбе, дар қароргоҳи Федератсияи футболи Тоҷикистон, қуръакашии мусобиқаи лигаи аввали кишвар баргузор шуд. Дар мусобиқаи имсола 12 даста ширкат меварзад, ки ин нисбат ба соли гузашта ду адад камтар аст.
Ба иттилои Федератсияи футболи Тоҷикистон, дар мусобиқаи имсолаи лигаи аввал як даста аз шаҳри Душанбе – «Шоҳмансур», шаш даста аз вилояти Хатлон – «Саройкамар» (Панҷ), «Ҳулбук», (Восеъ), «Панҷшер» (Ҷалолиддини Балхӣ), «Равшан» (Кӯлоб), «Ҳосилот» (Фархор) ва «Моҳир» (Ёвон), се даста аз вилояти Суғд - «Эсхата» (Хуҷанд), «Исфара» (Исфара) ва «Равшан» (Зафаробод), инчунин ду даста аз шаҳру навоҳии тобеи марказ – «Барқчӣ» (Ҳисор) ва «Ваҳдат» (Ваҳдат) – иштирок мекунанд.
Бар асоси қуръакашӣ дар нахустин даври мусобиқа дастаҳои зерин бо ҳам рақобат хоҳанд кард:
«Исфара» (Исфара) – «Равшан» (Зафаробод)
«Панҷшер» (Ҷалолиддини Балхӣ) – «Шоҳмансур» (Душанбе)
«Эсхата» (Хуҷанд) – «Ваҳдат» (Ваҳдат)
«Ҳосилот» (Фархор) – «Ҳулбук» (Восеъ)
«Равшан» (Кӯлоб) – «Саройкамар» (Панҷ)
«Барқчӣ» (Ҳисор) – «Моҳир» (Ёвон)
Бояд гуфт, ки мусобиқаи имсолаи лигаи аввали футболи Тоҷикистон даҳаи дувуми моҳи апрел шуруъ мешавад. Мусобиқа аз ду давра иборат аст. Ҳар як даста ҳамагӣ 22 бозӣ анҷом медиҳад. Тибқи низомномаи мусобиқа дастаи ғолиб ва ҷоизадори нуқраи лигаи аввали Тоҷикистон-2020 ба ҳаққи ширкат дар лигаи олӣ дар соли оянда мушарраф мешаванд.
Ёдовар мешавем, соли гузашта дар мусобиқаи лигаи аввали футболи Тоҷикистон дастаи “Локомотив-Помир”-и Душанбе ғолиб шуд ва ба ҳаққи ширкат дар лигаи олӣ дар мавсими соли 2020 мушарраф гашт. Дастаи «Файзканд»-и ноҳияи Восеъ, ки дар ҷойи дувум қарор гирифт ва соҳиби медалҳои нуқра гардид, инчунин дастаи “Душанбе-83”-и Душанбе, ки мақоми севумро касб намуда, бо медалҳои биринҷӣ мукофотонида шуд, феълан дар лигаи олии футболи Тоҷикистон бозӣ мекунанд.
