Былтыр Кыргызстандын ички дүң продуктусу 919 млрд сомдон ашып, 2021-жылга салыштырмалуу 7% өстү. Бул тууралуу Улуттук статистика комитетинин былтыркы жылдын январь-декабрь айларынын алгачкы жыйынтыктарын чыгарган маалыматында айтылат.
Экономиканын өсүү темпи негизинен товардык өндүрүш жана тейлөө кызматтарындагы жылыштар менен камсыздалды. Өндүрүш тармагы 12%, курулуш 8% жана айыл чарба тармагы 7% өстү. Кызмат көрсөтүү былтыр мурдагы жылга караганда 5%га көп чыккан.
Кыргызстандын ички дүң продуктусу соңку жылдары 3-4% өсүү ыргагы менен келаткан. 2020-жылы коронавирус пандемиясына байланыштуу 8,4% төмөндөө менен чыккан. Улуттук статистика комитетинин такталган эсебинде 2021-жылы экономиканын өсүү темпи 6,2% болгон.
ИДП – бул кадимки жашылча, мөмө-жемиштерден баштап, кен байлыктарга чейин өлкөдө өндүрүлгөн бардык товарлардын жана транспорт, туризм, соода сыяктуу кызмат көрсөтүүлөрдүн жалпы көлөмү. (ErN)
