Ата-энелерге бала тарбиялоонун сырларын кыргыз тилинде баяндаган китеп жарык көрдү. Бишкекте басылып чыккан «Балдар тарткан сүрөттөр эмнени түшүндүрөт?» китебинин автору - түрк жазуучусу Илхами Саваш. Бул тууралуу 9-сентябрда «Азаттык» радиосуна «Баластан» интерактив журналынын башкы редактору Жаныбек Абидетегин билдирди.
Китепти кыргыз тилине Кызжибек Чаткалбай кызы жана Айсулуу Койчубек кызы которушкан.
Түрк жазуучусунун эмгеги ата-энеге баласынын психологиялык калыптануусун таанып, руханий дүйнөсүн байытууга жардам берет.
Быйыл 1-июнь - Балдарды коргоо күнүнө карата Кыргызстан балдарынын алгачкы онлайн саммити өткөн. Анда адистерден тышкары балдар өздөрү өспүрүмдөрдүн маселелери тууралуу кеп козгоп, «Балдарга карата зордук-зомбулукту кантип токтотуш керек? Кыздарды эртелеп турмушка узатуу туура эмес. Карантин балдардын жашоосун кантип өзгөрттү? Биз жакшы мектепте окугубуз келет» деген маселелерди көтөрүп чыгышкан. (MSd)
