Алматы облысында жүргізуші жол жиегінде отырған балаларды қағып, қашып кетті

Алматы облысында Cobalt жүргізушісі жиектаста отырған балаларды қағып, оқиға орнынан қашып кетті. Желіде жантүршілерлік кадрлар жарияланды, деп хабарлайды Tengrinews.kz тілшісі.
Көлік қағып кеткені түсірілген видео әлеуметтік желілерде жарияланды. Кадрлардан автокөлік жиектаста отырған балаларды қағып, тоқтамастан оқиға орнынан кетіп қалғанын көруге болады.
Алматы облыстық полиция департаменті балаларды қағып кету дерегі бойынша полиция қызметкерлері сотқа дейінгі тергеу амалдарын жүргізіп жатқанын хабарлады.

"Жол-көлік оқиғасын жасағаннан кейін оқиға орнынан қашып кеткен 65 жастағы жүргізуші анықталып, ұсталды. Ол уақытша ұстау изоляторына қамалды. Оқиғаның барлық мән-жайын объективті түрде анықтауға бағытталған қажетті тергеу әрекеттері жүргізіліп жатыр", - деп жауап берді бізге баспасөз қызметі.

Тергеу барысы полиция департаменті басшылығының бақылауында екені нақтыланды.
Балалардың жағдайы
Қолда бар мәліметтерге сәйкес, балалар ауруханаға жеткізіліп, оларға ота жасалған.
"Қарасай клиникалық көпбейінді орталық аудандық ауруханасына жарақат алған кәмелетке толмаған екі бала жеткізілді. Екі пациентке де ота жасалып, кейін олар анестезиология, реанимация және қарқынды терапия бөлімшесінде жатты. Бүгінде пациенттердің бірі одан әрі емделу үшін хирургия бөлімшесіне ауыстырылды", - деп хабарлады өңірлік денсаулық сақтау басқармасы.
Екінші зардап шегуші анестезиология, реанимация және қарқынды терапия бөлімшесінде емін жалғастырып жатыр. Оның жағдайы ауыр деп бағаланып отыр.
Бұған дейін Алматыда Porsche жолаушылар автобусымен соқтығысты. Апат салдарынан бірнеше адам медициналық көмекке жүгінді.