Бас прокуратура Олеся Кексельдің әуежайдағы суретіне қатысты пікір білдірді
Бас прокуратура үйқамақта отырған Олеся Кексельдің жүріс-тұрысы туралы ақпаратқа пікір білдірді, - деп хабарлайды Tengrinews.kz.
Қадағалау органы мәліметінше, ол 20 ақпан мен 23 сәуір аралығында тергеу амалдарына қатысу үшін Алматыда ресми түрде болған. Қажетті процедуралар аяқталғаннан кейін ол Астанаға қайтып барған және қазір үйқамақта екені айтылды.
Қадағалау органы әлеуметтік желілерде Кексельдің әуежайда түскен суреттері тарағаннан кейін мәлімдеме жасады. Жазба авторлары атышулы істің фигуранты тергеу жүріп жатқан кезде қалалар арасында еркін жүргеніне наразылық білдірген.
Еске сала кетейік, Олеся Кексель азаптау ісіне қатысы бар деген күдікке ілінген. Бұған дейін Бас прокурордың орынбасары Ғалымжан Қойгелдиев қыркүйекте Кексельге бұлтартпау шарасын таңдау кезінде оның кішкентай баласы бар екені ескерілгенін айтқан еді.
Олеся Кексель - құқық қорғау органдарының бұрынғы жоғары лауазымды қызметкері. Ол әр жылдары Сыбайлас жемқорлыққа қарсы іс-қимыл ұлттық бюросы Тергеу департаменті басшысының орынбасары болды және Бас прокуратураның Арнайы прокурорлар қызметін басқарды. 2017 жылы ол "Жылдың мемлекеттік қызметшісі" атағына ие болған.
Азаптау ісі: Татубаев пен Кексельге қатысты тергеу неге созылып жатыр?