Conflict Intelligence Team: Карабахехь Азербайджанан агIор тIемаш бо Шемара баьхкинчу тIемалоша
Хьалхо социалан машанашкахь яьржира тIемалоша арахецна хила тарлуш йолу масех видео. Хезаш дарца цаьрца Iаьрбин маттахь ден къамелаш, ткъа гуш болчу нахана тIехь дара Азербайджанан доза лардечу эскархойн а, гIашсалтийн а духар.
CIT тобан эксперташа чIагIдарехь, социалан машанех пайдаоьцучийн аьтто баьлла юьйцу видеош билггал Азербайджанан карахь йолчу меттигашкара хилар. Масала, боху цара, Шемара тIемалой бу боьдучу тIеман къилбехьарчу декъехь, хилла дакъалоцуш деношкахь Гадрут юьрт къуьйсуш агIонаша бинчу тIамехь.
Шемара тIемалой Карабахерчу конфликтехь дакъалоцуш хиларх лаьцна хаам баржийра дуьненна а бевзачу массех хаамийн гIирсо. Washington Post газето яздира, Шемара баьхкинчу тIемалойх лаххара а 50 велла Карабахехь Азербайджанехьа тIом беш, аьлла.
Туркойчоьно а, Азербайджано а бакъ ца до эрмалошна дуьхьал бечу тIамехь Шемара тIемалой хилар. Амма уьш цигахь хиларх лаьцна къамел дира Францин президента Макрон Эммануэла. Хьалхо Туркойчоьнан президентаца хиллачу шен къамелехь Оьрсийчоьнан президента Путина аьлла, ша саготта ву боьдучу тIамехь Малхбалерчу регионера тIемалой хиларна.
1990-чу шерашкахь конфликт йолаелча, Эрмалойчоьнца бертахь йолчу Ломан Карабахехь а, цунна гергарчу Азербайджанан кIошташкахь а урхалла лелош бара эрмалой. Бутт бу хьал тIаме дирзина. Ша Азербайджан юьззина кIобалъеш хилар хаийтина Туркойчоьно.
Деношкахь Москвахь эрмалоша а, азербайджанхоша а барт бира тIемаш совцо, амма шина а агIоно вовшийн бехкейо и ларбеш бацарна. Лаьтташ ду тIематийсадаларш.