د دې اوونۍ د "هارون باچا هنري ګړۍ" خپرونې مېلمه سندرغاړی سني خان ترک دی چې د اصلاً خیبر پښتونخوا د مانسهرې ضلعې دی خو له تېرو یوشمېر کلونو راهیسې له خپلې کورنۍ سره په کاناډا کې اوسي. دی له هم هغه ځایه وخت په وخت سندرې خپروي. ترک وايي، د جلال اباد یوشمېر سندرغاړي یې خوښېږي. د ترک په خبره، هڅه کوي چې په خپلو سندرو کې د پښتو دودیزه او اصیله موسیقي وکاروي. د نوموړي د ژوند او هنر په اړه یې خبرې او ځینې سندرې په خپرونه کې واورئ.
د قامي اسمبلۍ په قرارداد کې غوښتنه شوې ده چې د درې کسیزه جرګګۍ پر ځای دې د سپریم کورټ د ټولو قاضیانو جرګه د انتخاباتو ځنډېدو قضیه واوري.
په کراچۍ کې د روژې په میاشت کې د نجونو لپاره د کرکټ سیالۍ پیل شوي دي. په دې سياليو کې په کراچۍ کې مېشتې پښتنې هم برخه اخلي. هغوی وايي چې د هلکانو تر څنګ نجونو ته هم بايد په کرکټ لوبو کې برابره ونډه ورکړل شي او د پاکستان په نورو ښارونو کې دې هم د نجونو لپاره دا ډول سیالۍ جوړې کړل شي.
د پاکستان د انرژۍ چارو وزیر مصدق ملک د اپرېل پر پينځمه په کراچۍ کې له سوداګرو سره تر ملاقات وروسته ورسره ګډې خبري غونډې ته وويل چې په هېواد کې هر کال د ګیس ذخیرې کمېږي.
په افغانستان کې په ملګرو ملتونو کې له ۶۰۰ ښځينه کارکوونکو څخه یې ۴۰۰ افغانانې دي او په هغه هېواد کې د ملګرو ملتونو د ټولو ۳،۹۰۰ کارکوونکو له ډلې یې ۳،۳۰۰ افغانان دي.
په افغانستان کې نوی ښوونیز کال پیل شو خو یوازې د هلکانو لپاره. له شپږم ټولګي پورته نجونه لا هم په کورونو کې پاتې دي او ښوونځیو ته نه پرېښوول کېږي. د طالبانو حکومت منځنیو ښوونځیو، لېسو او پوهنتونونو ته د نجونو او ښځو د تګ مخه نیولې ده. زده کوونکې غوښتنه کوي چې طالبان دې ژرترژره ټولو نجونو ته د تعليم اجازه ورکړي. د اسوشيېټېډ پريس اژانس له ويډيوګانو جوړ رپورټ.
