Казанның Имәнлек урамында җәяүлеләр кичүендә 12 яшьлек кыз баланы машина бәрдергән. Әлеге фаҗигане видеокүзәтү камерасы төшереп торган. Бәрелгәч, бала әлеге урыннан берничә метрга очып киткән. Бу турыда «Татарстан 24» хәбәр итте.
Фаҗига 13 майда иртән була. Кыз көйләнми торган җәяүлеләр кичүе аша юлдан чыгарга маташа. Шунда аны машина бәрдерә. Кадрларда баланы машина таптаган мизгел, йөртүченең чыгып бала янына килүе, арлы-бирле йөгерүе күренә.
Шаһитлар сүзләренчә, бу урында кичү тиешенчә җиһазланмаган – светофор һәм «ята торган полицейский» юк, бу – куркыныч тудыра.
Имгәнгән кызны хастаханәгә илткәннәр. Ул төрле травмалар алган.
Соңрак билгеле булганча, «Форд» белән идарә итүче 21 яшьлек егет авария вакытында игътибарын телефонга юнәлткәнен әйткән. Бу турыда шәһәр полициясе матбугат хезмәте хәбәр иткән.
Тикшерү бара, диелә хәбәрдә.
