Математик-педагог Батырбек Дуулатов каза болду
Физика-математика илимдеринин кандидаты, мыкты математика мугалими Батырбек Дуулатов 30-июнда 59 жашка чыккан. Ал 1961-жылы Нарын облусунун Жумгал районунда туулган.
1978-жылы Кыргыз улуттук университетинин (КУУ) механика-математика факультетине өтүп, окуусун кийин Москва мамлекеттик университетинде улантып, бул окуу жайын 1984-жылы аяктаган.
КУУнун Кыргыз-Европа факультетинде жана Кыргыз-Түрк «Манас» университетинин Экономика факультетинде сабак берчү.
Мындан тышкары поэзия ышкыбозу эле. Акыркы жолу 19-июнда «Фейсбуктагы» баракчасына «Өкмөт ооруганда» деген ырын жарыялаган. Анда:
«...Өчкүргөнү басылбайт бир мандем бар,
Өпкөсүнө түшкөн окшойт вирусуңар,
Өкмөттүн ченейличи дене табын!» - деген саптары бар.
Жалпысынан 18-марттан 1-июлга чейин өлкөдө коронавирус 5735 адамдан табылды, алардын ичинен 62 бейтап кайтыш болду, 2447 бейтап айыгып кетти.
Анализинен коронавирус табылбай, бирок өпкөсүнөн кагынып, оор абалга туш болгон бейтаптар күндөн-күнгө көбөйүп жатат. (RK)