Җырчы шушы көннәрдә социаль челтәрдәге сәхифәсенә бер видео куйган. Анда ул ачык һавадагы концертта тамашачы белән бергә татар халкының «Эх, тала, тала» җырын башкара.
«Янаул якларында Тюбинг-парк Таш-Елгада кыздырдык... Әпәйт халыкны җырлата, үзе җырламый, Әнвәр үзгәрде, эреләнде, дияр инде кайберәүләр...
Бу концерт беткәч, азактан рәхәтләнеп бергә җырладык.
Сез ничек уйлыйсыз, языгыз әле?» – дип, концерт барышында халыкны җырлатуга карата виртуаль дусларының мөнәсәбәте белән кызыксынган Әнвәр.
«Халык сүзләрен белеп, бертавыштан җырлаган очракта, җырчы өчен бик күңелле күренеш инде бу, әлбәттә», «Маладис, халык белән бергә җырларга кирәк», – дип комментарийлар язганнар.
«Әнвәр! Иҗатыгызны бик яратабыз. Ләкин бит концертка тамашачы сезне тыңларга килә, ә халыкны түгел. Концерт вакытында артист үзе җырларга тиеш. Син генә түгел, бик күп артистлар шулай кыйлана башлады... Бу дөрес түгел! Магомаев һәм башка бөек артистлар алай итмәде. Концерт тәмамлаганнан соң гына ярый анысы», «Дөрес, тамашачыны җырларга мәҗбүр итү миңа да ошамый. Кеше билет алып, артистны тыңларга бара бит!», «Халыкны җырлату мәсьәләсенә килгәндә, һәр нәрсәнең чиге бар. Әз генә, урынын белеп кенә, тамашачыны җырлатырга мөмкин. Концерт эстетик яктан матур, зәвыкле булырга тиеш. Соңгы арада кайбер артистларның тамашалары «балаган»ны хәтерләтә башлады алайса...» – дип язучылар булган.
