Энди мобил рақамни онлайн MyGov орқали бошқа номга ўтказиш мумкин
Ўзбекистонда рақамли хизматлар янада қулайлашиб, аҳоли учун янги имкониятлар яратилмоқда. Энди фуқаролар ўзларига тегишли мобил телефон рақамини бошқа шахс номига масофадан туриб, онлайн тарзда ўтказиши мумкин. Бу ҳақда MyGov портали расман маълум қилди.
Авваллари бундай жараён анча вақт ва ҳаракат талаб қилар эди. Яъни рақам эгасини ўзгартириш учун амалдаги эга ва янги фойдаланувчи биргаликда мобил оператор офисига бориши, навбат кутиши ва ҳужжатларни жойида имзолаши шарт эди. Энди эса бу босқичларнинг барчаси рақамлаштирилиб, бир неча босқичда онлайн тарзда амалга оширилади.
Хизматдан фойдаланиш жараёни оддий: фуқаро My.gov.uz портали ёки MyGov мобил иловасига кириб, “Мобил рақамни қайта расмийлаштириш” бўлими орқали ариза юбориши керак. Керакли маълумотлар киритилгандан сўнг, мурожаат тасдиқ учун юборилади.
Муҳим жиҳат — жараёнда ҳар икки томон ҳам иштирок этади. Яъни рақамни ўтказаётган шахс ҳам, уни қабул қилаётган фуқаро ҳам MyID тизими орқали Face-ID тасдиқдан ўтиши шарт. Бу эса хавфсизлик ва шаффофликни таъминлайди.
Аризалар одатда 1 кундан 5 кунгача бўлган муддатда кўриб чиқилади. Ҳозирча мазкур хизматдан Uztelecom, Beeline ва Mobiuz абонентлари фойдаланиши мумкин. Яқин вақтларда бошқа операторлар ҳам ушбу тизимга босқичма-босқич уланиши режалаштирилган.
Тўлов масаласига келсак, хизмат нархи ҳар бир операторнинг тариф сиёсатига қараб шаклланади. Айрим ҳолларда эса, хусусан яқин қариндошлар ўртасида рақамни ўтказиш бепул амалга оширилиши мумкин.
Қисқаси, янги хизмат орқали ортиқча оворагарчилик ва вақт йўқотишларга чек қўйилмоқда. Бу эса рақамли Ўзбекистон сари яна бир қадам, десак муболаға бўлмайди.