Винисиус атрофидаги низо “Реал”ни иккига бўлмоқда...
“El Chiringuito TV” журналисти Хуанфре Санс “Реал Мадрид” вингери Винисиус Жуниорни жамоа ичида зиддият ва ички келишмовчилик келтириб чиқаришда айблаб, клуб раҳбариятини бразилиялик футболчини сотиш имкониятини кўриб чиқишга чақирди.
Унинг фикрича, “Реал” учун энг тўғри қарор — футболчи билан хайрлашиш бўлиши мумкин.
“Мен қатъий ишонаманки, ‘Реал’ учун энг тўғри йўл — уни сотиш. Чунки ‘Барселона’га қарши ўйин куни у кийиниш хонасида ички зиддият чиқарган, вазиятни назоратга олган ва ҳеч ким уни тўхтатмаган”, — деди Санс.
Журналистнинг таъкидлашича, Винисиуснинг бугунги ҳаракатлари ўтмишдаги хатоларни қисман тан олишга ўхшайди, аммо у фикрича, футболчи ўз имкониятларини тўлиқ сарфлаб бўлган.
Унинг сўзларига кўра, “Реал” Винисиусни асосан юқори савиядаги ўйини учун сақлаб келган, аммо клуб унинг хулқий жиҳатларига ҳам катта “баҳо” тўлаган.
Санс фикрича, жамоада натижалар яхши бўлганда айрим камчиликлар кўзга ташланмаслиги мумкин, аммо муваффақиятсиз мавсумлар бошланганда вазият кескинлашади.
“Муваффақиятсиз даврлардан кейин кескин қарорлар қабул қилиш керак”, — дея қўшимча қилди у.
Айни пайтда эса “Реал” майдонда ҳам қизғин вазиятни бошдан кечирмоқда. Кеча жамоа “Алавес”ни 2:1 ҳисобида мағлуб этди. Учрашув бошида “Сантьяго Бернабеу” мухлислари Винисиус ва Мбаппени ҳуштаклар билан қарши олган.
Бироқ ўйин давомида Винисиус ғалаба голини урди ва голдан сўнг мухлислардан узр сўраб, клуб эмблемасини ўпиб, вазиятни юмшатишга уринди.