IELTSда юқори балл тўплаб, сарфланган пулни ортиқча оворагарчиликсиз қайтариб олиш мумкин
Бугун IELTS, TOEFL, GMAT каби халқаро имтиҳонларда ўзини синаб кўришни хоҳлайдиганлар кўп. Лекин унгача анча-мунча жараённи босиб ўтиш керак: яъни ўқиш, изланиш, меҳнат қилиш. Масалан, хорижий тилни пухта ўрганишга алоҳида вақт ажратиб, интернетдаги бепул тил ўргатувчи каналлардан фойдаланиш ёки маблағ топиб, яхши репетиторларга қатнаш деганларидек…
Юртимизда билимга чанқоқ ёшлар учун талай имкониятлар яратилган. Фақат ёшларимиз бу шароитлардан вақтида хабардор бўлиб, ўрнида фойдаланиб қолишлари керак.
Халқаро имтиҳон тизимлари бўйича юқори балл (даража) тўплаганларга имтиҳон топшириш харажатларининг тўлиқ қоплаб берилиши эса ана шундай зўр имкониятлардан бири.
Бунга IELTSдан тортиб инглиз, немис, француз, испан, италян, турк, корейс, япон, хитой, араб, рус тилларида ўтказиладиган жами 18 та имтиҳон турлари киритилган экан.
Имтиҳонда юқори балл олган одамга сарфланган пулнинг қайтарилиши мукофотдек гап, шундай эмасми? Аризанинг my.gov.uz портали орқали онлайн топширилиши катта қулайлик!
Айтганча, бу имконият фақат 31 ёшгача бўлганларга тааллуқли. Балки, мана шу масалани қайта ўйлаб кўриб, ёш чегарасини бироз узайтирган маъқулми?.. Чунки ўрта ёшлилар орасида ҳам IELTS каби имтиҳонларга қизиқиш билдираётганлар кўп. Улар билим олишга сармояни оиласи, рўзғор, фарзандлар харажатидан тежаб киритганлари боис компенсациядан кўпроқ манфаатдор бўлишлари аниқ.