Осиё футбол конфедерацияси Чемпионлар Лигаси мавсумининг «куз-баҳор» тизимига ўтганини расман эълон қилди. Бу ҳақда футбол мутахассиси Алишер Никимбаев хабар берди. Фото: Telegram / @ANikimbaev Қайд этилишича, янги тизимга ўтиш кейинги йилда содир бўлади. Жорий мавсум эса ўтиш даври вазифасини бажариб беради — 2022 йилнинг март ойида бошланиб, 2023 йилнинг февралида тугайди. Шунингдек, Чемпионлар Лигасининг Ғарбий минтақаси гуруҳ босқичи ўйинлари вақти ҳам ўзгарган. Баҳслар аввал май ойига режалаштирилган бўлса, энди 7—27 апрель кунлари марказлашган ҳолда бўлиб ўтиши маълум қилинди. Плей-офф ўйинлари эса 2023 йил февраль ойида ўтказилади. Эслатиб ўтамиз, бу йилги баҳсларда Ўзбекистон номидан икки клуб мусобақада қатнашади. Мамлакат чемпиони «Пахтакор» тўғридан-тўғри гуруҳ босқичига йўл олган бўлса, «Насаф» плей-офф ўйинида БААнинг «Банияс» клубига қарши саф тортади. Агар Рўзиқул Бердиев жамоаси гуруҳ босқичи йўлланмасини қўлга киритса, Суперлигада 2-ўринни эгаллаган «Сўғдиёна» ОФК Кубоги гуруҳ босқичида ўйнайди. Гуруҳ босқичига қуръа ташлаш маросими 17 январь куни бўлиб ўтади.
