Ханси Флик Маркус Рэшфорд ва Роберт Левандовски келажаги ҳақида гапирди

Барселона бош мураббийи Ханси Флик жамоанинг асосий ҳужумчилари Маркус Рэшфорд ва Роберт Левандовскининг келажаги борасидаги якуний қарорни мавсум якунига қадар қолдирди. Ла Лига чемпионлигини қўлга киритганига қарамай, клубнинг молиявий аҳволи ушбу футболчиларнинг Каталонияда қолишини шубҳа остига қўймоқда. Бу ҳақда Goal.com хабар беради.

Реал Мадрид устидан қозонилган 2:0 ҳисобидаги ғалабадан сўнг, Ханси Флик журналистларга берган интервюсида ҳар икки футболчининг жамоа муваффақиятига қўшган ҳиссасини юқори баҳолади. Мураббий мавсум сўнггида барча жиҳатлар таҳлил қилинишини ва шундан сўнггина аниқ хулосага келинишини таъкидлади.

Манчестер Юнайтеддан ижарага олинган Маркус Рэшфорд жорий мавсумда 14 та гол ва 14 та голли узатмага муаллифлик қилди. Барселона футболчини тўлиқ сотиб олиш ҳуқуқига эга бўлса-да, клубнинг иқтисодий имкониятлари бу трансферни амалга оширишга етадими ёки йўқ, ҳозирча номаълум.

Роберт Левандовски эса 38 ёшга яқинлашмоқда ва унга Саудия Арабистони ҳамда АҚШ клубларидан қизиқишлар мавжуд. Ханси Флик полшалик ҳужумчи билан аввал ҳам ишлагани ва унинг маҳоратига юқори баҳо беришини билдириб, келгуси мавсум учун қарорлар яқин вақт ичида қабул қилинишини қайд этди.

Ханси Флик ўзининг 2028-йилга қадар мўлжалланган янги шартномасини имзолаганини тасдиқлади ва Барселона билан Чемпионлар лигаси ғолиблигини қўлга киритиш асосий орзуси эканлигини яширмади. Ҳозирда жамоа олдида мавсумни 100 очко билан якунлаш вазифаси турибди.