Сургут укучылары «Татарстан киносы» айлыгы кысаларында «Әлмәндәр» фильмын караган
Сургут шәһәрендә 1-30 апрельдә Россия халыклары бердәмлеге елына багышланган округкүләм «Татарстан киносы» айлыгы уза. Акция кысаларында Сургут татарлары мили-мәдәни автономиясе каршында эшләүче якшәмбе татар мәктәбе укучылары «Әлмәндәр» анимацион фильмын караган. Бу хакта Сургут татарлары мили-мәдәни автономиясе ВКонтакте социаль челтәрендәге төркемендә хәбәр итә.
Матур образлар, мавыктыргыч сюжет һәм татарча сөйләм – болар барысы да балаларда зур кызыксыну уятты. Алар геройларны игътибар белән күзәтте, таныш сүзләрне отып алырга тырышты, сеанстан соң тәэсирләре белән уртаклашты. Бу – гади мультфильм гына түгел, буыннар бәйләнешен тою һәм безнең уртак мәдәни мирасыбызның никадәр күптөрле һәм матур булуын аңлау мөмкинлеге, диелә хәбәрдә.
Мультфильмны карау телне һәм мәдәниятне өйрәнүдә мөһим адым булган: балалар татар сөйләмен ишетеп кенә калмаган, ә милли иҗат элементлары белән дә танышкан.