Тәрәзәдән бала егылып төшкән Казан мәктәбендә психологик тренинглар үткәреләчәк
Кичә Казанның 98 нче мәктәбе тәрәзәсеннән бала егылып төште. Әлеге вакыйгадан соң мәктәптә балалар өчен психологик тренинглар үткәреләчәк.
Исегезгә төшерәбез, 4 нче сыйныф укучысы мәктәпнең өченче катыннан егылып төшеп, зыян күрә. Имгәнгән һәм сыну җәрәхәтләре алган баланы авыр хәлдә Республика балалар клиник хастаханәсенә алып китәләр. Вакыйга урынына полиция килә һәм тикшерү эше башлый. Хәзер малайның хәле уртача авырлыкта, тотрыклы дип бәяләнә.
Казан Мәгариф идарәсендә хәбәр итүләренчә, мәктәптә барлык параллель сыйныфларда психологлар катнашында тренинглар узачак. Малай укый торган сыйныфка аерым игътибар биреләчәк.