Татарстан Урман хуҗалыгы министрлыгы яшь белгечләр өчен түләүләрне арттыра

Быелдан Татарстанда урман хуҗалыгы тармагына эшкә килүче яшь белгечләргә бер тапкыр бирелә торган түләүләрнең күләме арткан. Урта һөнәри белем бирү учреждениеләрен тәмамлап килүчеләргә түләү 150 меңнән – 300 мең сумга кадәр, югары уку йортларын тәмамлап килүчеләргә – 300 меңнән 500 мең сумга кадәр арттырылган. Бу хакта бүген ТР урман хуҗалыгы министры Равил Кузюров хәбәр итте.

«Кадрлар мәсьәләсендә кыенлыклар бар, әмма алар чишелмәслек түгел. Штатлар 90 процентка тулган. Соңгы елларда Татарстан Рәисе ярдәме белән яшь белгечләргә бер мәртәбә бирелә торган түләүләр каралган. Быелдан башлап алар 300 һәм 500 мең сум тәшкил итә», - дип сөйләде ул «Татар-информ»га Казанда узган «Урман һәм азык-төлек» күргәзмәсендә.

Бүгенге көндә республика урманчылыклары һәм урман хуҗалыклары 30 төрле эш урыны тәкъдим итә. Инженерларга һәм урман хуҗалыгы осталарына ихтыяҗ аеруча зур. Районнарда эш эзләүчеләргә 40-56 мең сумга кадәр хезмәт хакы, шулай ук тулы социаль пакет тәкъдим ителә, тулай торакта яшәү өчен урыннар бар.

«Безнең ресурслар көчле. Татарстан Рәисе моңарчы күрелмәгән ярдәм күрсәтә. Без техник җиһазлау, инвентарь, оештыру техникасы өлкәсендә барлык кирәкле әйберләр белән тәэмин ителгән. Биналарда вакытында ремонт үткәрелә. Республикада эшләү өчен яхшы шартлар тудырыла, шуңа күрә безгә башка төбәкләрдән яшьләр укырга килә» , - дип ассызыклады Кузюров.

Ул искәрткәнчә, Россия Президенты Владимир Путинның юлламасында урманчыларны лаеклы хезмәт хакы белән тәэмин итәргә кирәклеге турында әйтелде.

«Урман һәм азык-төлек» күргәзмәсе Халыкара урман көнендә Казан дәүләт аграр университетында ачылды. Биредә Татарстан урман хуҗалыклары урман янгыннары вакытында һәм урман культуралары сезонында кулланыла торган техниканы тәкъдим итте.