Табиблар кемнәргә бәкедә су коенырга ярамавы турында сөйләде
Йөрәк-кан тамырлары, тын юллары авыруларыннан интегүче, неврологик тайпылышлары булган кешеләргә бәкедә су коенырга ярамый. Бу хакта табиб-терапевт Александра Разаренова сөйләде.
«Бу астма, эпилепсия, шулай ук терәк-хәрәкәт аппараты белән проблемалар. Әлбәттә, йогышлы авырулар һәм алкоголь исереклеге», – диде Разаренова.
Медицина фәннәре докторы, иммунолог-педиатр Андрей Продеус сүзләренчә, бәкедә су коену – инсульт һәм инфаркт китереп чыгарырга мөмкин.
«Бәкедә су коену – әзерлексез кеше өчен җитди проблемалар китереп чыгара: йөрәк-кан тамырлары проблемалары килеп чыга, алар инсульт һәм инфаркт китереп чыгарырга мөмкин», – диде табиб.
Бозлы суда коену өчен алдан ук әзерләнергә кирәк, организм температураның кисәк үзгәрүенә күнегергә тиеш.
«Тән һәм йөрәк-кан тамырлары системасы, безнең кан тамырлары температураның мондый кискен үзгәрүенә ияләнә алсын өчен, кеше гомер буе, яки һичьюгы ел дәвамында чыныгу белән шөгыльләнергә тиеш», – дип аңлатты Разаренова.
«Радио 1» хәбәр иткәнчә, бәкедә коеныр алдыннан туклану режимын сакларга, тиз үзләштерелә торган углеводларны азрак ашарга кирәк.
«Әгәр рационда гади углеводлар күп була икән, бу глюкоза күләме тирбәнешенә китерә, ә бу күпмедер дәрәҗәдә тамырларның микроҗәрәхәтләнүе булып санала, һәм бу да шулай ук безнең тамырларның температура үзгәрешенә вакытында реакция белдерә алуына тискәре йогынты ясый торган факторларның берсе булып тора», – дип сөйләде табиб.
Әгәр дә бәкегә чуму теләге бар икән, яхшы физик әзерлек булырга тиеш, дип өстәде табиб. Бәкедә коеныр алдыннан табиб белән киңәшләшергә кирәк.
Бары тик махсус җиһазландырылган урыннарда һәм экстрен очрак килеп чыкканда үз вакытында ярдәм күрсәтә алырлык хезмәтләр күзәтүендә генә су коенырга кирәк, дип кисәтә терапевт.