Гражданлык җәмгыятен үстерү өчен Татарстан Рәисе грантына гаризалар кабул итү төгәлләнә
3 июльдә гражданлык җәмгыятен үстерү өчен Татарстан Республикасы Рәисе грантларын тәкъдим итү конкурсына гаризалар кабул итү тәмамлана.
Гаризалар 21 юнәлеш буенча кабул ителә. Алар арасында социаль хезмәт күрсәтү, гражданнарга социаль ярдәм күрсәтү һәм аларны яклау; гаиләгә, ата-анага, балаларга ярдәм итү; тарихи хәтерне саклау; мәдәният һәм сәнгать өлкәсендәге проектларга булышлык итү һ.б. юнәлешләр бар. Моннан тыш, ике юнәлеш (татар милли мәдәниятен үстерү һәм традицияләрне саклау, иҗтимагый дипломатия үсеше һәм ватандашларга ярдәм итү) буенча бәйгедә шул исәптән Россия Федерациясенең башка субъектларыннан коммерцияле булмаган оешмалар да катнаша ала.
Җиңүчеләрне экспертлар бергәлеге эше йомгаклары буенча республика конкурс комиссиясе билгеләячәк. Гомуми грант фонды 159 миллион сумнан артып китә. Бәйгедә катнашучылар консультатив ярдәм сорап 79872624068 телефоны буенча «Социаль юнәлешле коммерцияле булмаган оешмаларга ярдәм буенча республика ресурс үзәге» коммерцияле булмаган автоном оешмасына, шулай ук муниципаль районнарда һәм Татарстан Республикасы шәһәрләрендә урнашкан муниципалитетара ресурс үзәкләренә мөрәҗәгать итә ала.
Тулырак мәгълүмат сылтама буенча тәкъдим ителгән. Шунда ук катнашу өчен заявка да калдырырга мөмкин.
Бәйгене оештыручылар - Республика конкурс комиссиясе һәм «Социаль юнәлешле коммерцияле булмаган оешмаларга ярдәм итү буенча республика ресурс үзәге» коммерцияле булмаган автоном оешмасы. Конкурсның максаты - гражданлык җәмгыятен үстерүдә катнашучы коммерцияле булмаган оешмаларга дәүләт ярдәме күрсәтүне тәэмин итү.