Кызыл Яр авылында яңа мәчет нигезенә беренче таш салдылар
Узган шимбәдә Самара өлкәсенең Кызыл Яр авылы читендә 700 урынга исәпләнгән мәчет нигезенә беренче нигез ташы салу тантанасы булды. Бу хакта Россия мөселманнарының Үзәк Диния нәзарәте составындагы Самара өлкәсе мөселманнары төбәк Диния нәзарәте үзәкләштерелгән дини оешмасы хәбәр итә.
Гадәттәгечә, тантана Коръән сүрәләрен укудан башланды. Шуннан соң аланда урнаштырылган сәхнәдән хөрмәтле кунаклар җыелган халыкны Красноярск районы һәм төбәк өчен мөһим булган бу вакыйга белән котлады һәм сәламләде.
Биредә үк мөфти Талип хәзрәт Яруллин мәчет төзелешенең идея илһамчысы, җирле дини оешма рәисе Җанибәк Шуриевка һәм Кызыл Яр җирлеге башлыгы Алексей Бушевка Самара өлкәсе мөселманнары төбәк Диния нәзарәтенең Рәхмәт хатларын тапшырды.
Ташның Красноярск районы оешуга 95 ел тулу елында салынуы символик әһәмияткә ия. Район башлыгы Михаил Белоусов, кунакларны һәм катнашучыларны сәламләп, әлеге чараның күпмилләтле муниципаль район өчен тарихи вакыйга булуын ассызыклады.
«Күп еллар дәвамында биредә яхшы күршеләр булып, тынычлыкта, татулыкта һәм иҗади хезмәттә йөздән артык милләт вәкиле яши. Алар арасында биш меңнән артык мөселман бар. Әлбәттә, безнең җирдә мондый объектларның барлыкка килүе бик мөһим», — диде ул.
Кызыл Ярда мәчет төзелеше хәйрия иганәләре хисабына башкарылачак. Әлегә булачак бинаның эскиз проекты гына әзерләнгән. Якын арада проект-смета документациясен әзерләү эше башланачак, диелә хәбәрдә.