Татарстан коткаручылары җиләккә дип китеп адашкан өлкән яшьтәге ханымга ярдәмгә килде
Кичә кич Яшел Үзәндә яшәүче хатын-кыздан Олы Шырдан авылы янында 80 яшьлек ахирәтенең югалуы турында хәбәр килгән.
Ханым җиләккә дип киткән, тик аның хәле начарлана һәм ул адаша. «Татар-информ»га бу хакта Россия Гадәттән тыш хәлләр министрлыгының Татарстан Республикасы буенча Баш идарәсе матбугат хезмәтендә хәбәр иттеләр.
Өлкән яшьтәге хатын-кызны эзләүгә полиция хезмәткәрләре, Россия Гадәттән тыш хәлләр министрлыгының Казан эзләү-коткару отряды коткаручылары һәм ашыгыч медицина ярдәме хезмәткәрләре җибәрелгән.
23.55 сәгатьтә коткаручылар басу юлында ятып торган хатын-кызны таба. Аны ашыгыч ярдәм машинасына утырталар. Соңрак ханымны Яшел Үзән үзәк район хастаханәсенә җибәргәннәр.