Түбән Камада «Тәмәкене кәнфиткә алыштырабыз» дип исемләнгән сәламәтләндерү акциясе узды.
Чара Үзәк базар янында узды, аны иҗтимагый сәламәтлек һәм медицина профилактикасы үзәгенең хезмәткәрләре үткәрде. Бу хакта Түбән Кама муниципаль районының сәламәтлек саклау идарәсенең матбугат хезмәтенә сылтама белән «Туган як» сайтында хәбәр ителә.
Акция барышында медицина хезмәткәрләре тәмәкене кәнфиткә алыштырып кына калмады, тәмәке тартучыларга бу гадәтнең зыянлы булуын да искәртте.
«Тәмәке тартучылар еш кына үпкәдәге яман шеш һәм хроник бронхиттан җәфа чигә. Тәмәке барлык органнарга да зыян китерә. Шулай ук, тәмәке тартуның куркынычсыз ысулы да юк, шуңа күрә, бу гадәттән бөтенләй баш тартырга кирәк», - дип сөйләде табиб Юлия Чуданова.
Сүз уңаеннан, кәнфитне «тәмәкене беркайчан да тартмадым, тартмыйм һәм сезгә дә киңәш итмим», дигән түбәнкамалыларга да өләштеләр.
