(Казан, 21 март, «Татар-информ»). Казан, Чаллы шәһәрләрендә һәм Татарстанның Яшел Үзән районында 1 апрельдән балаларны бакчага комплектлау башлана. «1 апрельдән Казан, Чаллы, Яшел Үзән районында мәктәпкәчә белем бирү оешмаларына комплектлау башланачак. Барлык ата-аналар да шәхси кабинетта элек бирелгән гаризаларны күрә алмау сәбәпле, балалар бакчалары мөдирләре ата-аналарга шалтыратып алачак», — диделәр Татарстан Мәгариф һәм фән министрлыгы матбугат хезмәтендә. Татарстанның дәүләт һәм муниципаль хезмәтләр порталы аша балалар бакчасына гаризалар кабул итү сервисы вакытлыча туктатылды. Элек бирелгән гариза статусын «Бердәм дәүләт һәм муниципаль хезмәтләр (функцияләр) порталы» федераль системасы аша хәбәр итүгә язылган ата-аналар тикшерә ала. Мәктәпкәчә мәгариф оешмаларына урыннар гаризада күрсәтелгән балалар бакчасына йөри башлау датасы нигезендә бүленә. Сайланган дата җиткәнче, позиция чиратта чагылмый. «Ата-аналарга алдан бирелгән гаризаларның барысы да Татарстан дәүләт хезмәтләре порталы аша „Электрон балалар бакчасы“ автоматлаштырылган мәгълүмат системасында сакланды һәм балалар бакчасына теләү датасы нигезендә комплектлау көтә», — дип аңлаттылар ведомствода. Электрон чират мәсьәләсе буенча Татарстан Мәгариф һәм фән министрлыгының кайнар элемтә телефоны (843)294-95-08) буенча мөрәҗәгать итәргә була.
