(Казан, 7 декабрь, «Татар-информ»). Коронавирусның омикрон-штаммы йоккан чакта, нигездә, ковидның җиңел симптомнары барлыкка килә.
Көньяк Африка Республикасы Медицина ассоциациясе рәисе Анжелик Кутзе сүзләренчә, галимнәр вирусның яңа штаммын йоктырган 70 пациентның хәләтен өйрәнгән. Ике атна дәвамында аларда чирнең җиңел билгеләре күзәтелгән. Бу — баш һәм тамак авырту, хәлсезлек. Әлеге билгеләр «омикрон»ны «дельта» штаммыннан аерып тора.
«Омикрон» штаммы икенче төрле. Хәзергә ис һәм тәм югалмый, шулай ук һава җитмәүдән интегү юк. Авыручылар арткан очракта ни буласын белмибез», — диде белгеч.
Әмма кайвакыт җитдирәк симптомнар да очрый. Кагыйдә буларак, алар коронавирустан прививка ясатмаучыларга кагыла, диде Анжелик Кутзе.
