(Казан, 26 август, «Татар-информ»). Мәҗит Гафури исемендәге Башкорт академия драма театрының яңа сезоны 22 сентябрьдә Мостай Кәримнең «Кыз урлау» пьесасы буенча музыкаль комедия белән ачыла. 12-16 ноябрьдә Камал исемендәге Татар академия драма театрының Уфага гастрольләре билгеләнгән, дип хәбәр итә « Башинформ » агентлыгы.
Камал театрының Уфа гастрольләре сентябрь аенда булырга тиеш иде, ләкин аның вакыты соңракка күчерелгән. Камал театры Уфа гастрольләрен җанисәптән соң үткәрүне сәясәткә бәйләп карамаска өнди , дип язган идек.
Башкортстан драма театры директоры Иршат Фәйзуллин сүзләренә сылтама белән «Башинформ» хәбәр иткәнчә, быел көзен Уфада Оренбург, Татарстан һәм Кырым республикаларыннан театрлар гастрольләре көтелә. Алар барысы да Башкортстан драма театры сәхнәсендә чыгыш ясаячак.
Соңрак Камал театрының инстаграмдагы сәхифәсендә Уфа гастрольләре турында хәбәр чыкты. «9 ноябрьдән 16 ноябрьгә кадәр Уфада Г.Камал исемендәге Татар дәүләт Академия театрының күптән көтелгән гастрольләре уза. Гастрольләр афишасында соңгы сезон премьералары һәм легендар „Зәңгәр шәл“ спектакле», диелә бу хәбәрдә.
«Башинформ» хәбәрендә әйтелгәнчә, Башкорт драма театрында 9-12 сентябрьдә «Зур гастрольләр» федераль программасы кысаларында М.Горький исемендәге Оренбург өлкәсе драма театры чыгыш ясаячак.
Бу вакытта М.Гафури исемендәге Башкортстан академия драма театры Гүзәл Яхина романы буенча куелган «Зөләйха күзен ача» спектакле белән Самара өлкәсенең Яңа Куйбышев шәһәренә гастрольләрдә була.
14-16 сентябрьдә шул ук программа кысаларында Башкортстан театрының Кырым Республикасында гастрольләре уза. 20 сентябрьдә Башдрамтеатр Олжас Жанайдаровның «Джут» спектакле белән К.Тинчурин исемендәге Халыкара заманча драматургия фестиваленә бара.
Октябрьдә Россия, Башкортстан һәм Татарстанның халык артисты Фидан Гафаров концертлары планлаштырылган, диелә хәбәрдә.
