(Казан, 9 август, «Татар-информ»). Татарстанда соңгы тәүлектә Covid-19 коронавирус инфекциясе йоктыруның 50 яңа очрагы ачыкланган. ТР Сәламәтлек саклау министрлыгының матбугат хезмәтеннән хәбәр итүләренчә, өч кеше чирне читтә йоктырып кайткан, калганнары башка авырулар белән аралашу нәтиҗәсендә эләктергән. «17 кеше хастаханәгә озатылган, 33 кеше өендә дәвалана», - диелә ведомство хәбәрендә. Казанда – 23, Чаллыда – 13, Тукай районында – 5, Түбән Кама районында – 3, Алабуга һәм Зәй районнарында – икешәр, Актаныш һәм Сарман районнарында берәр очрак ачыкланган. Пандемия башланганнан алып республикада коронавирус инфекциясенең 24 387 очрагы теркәлгән, 21 555 кеше (шуларның бишесе – узган тәүлектә) терелгән. Республикада барлыгы 879 524 кеше коронавируска каршы прививка ясаткан. 687 790 кеше икенче дозаны да алган.
