(Казан, 8 май, «Татар-информ»). Казахстан мөселманнары Диния нәзарәте рәисе, Югары мөфти Наурызбай кажы Таганулы Алмата өлкәсенә эш сәфәрендә Талгар районында Абу Бәкер әс-Сыддык исемендәге мәчет ачуда катнашты. Югары мөфти яңа мәчетнең ал тасмасын кисте һәм Аллаһ йортын төзергә ярдәм иткән барлык шәһәр халкына рәхмәт белдерде. Бу турыда Казахстан мөселманнары Диния нәзарәте матбугат хезмәте хәбәр итә. «Мәчет төзү — игелекле эш. Бигрәк тә изге Рамазан аенда игелекле эшләрнең савабы күп тапкыр арта. Бу мәчетне ачуга ярдәм иткән гражданнардан Аллаһы Тәгалә канәгать булсын. Яңа мәчет һәрвакыт намаз укырга килүчеләр белән тулып торсын», — диде Наурызбай Таганулы. Яңа мәчет Пәйгамбәрнең дәвамчысы һәм мөселманнарның беренче хәлифәсе Абу Бәкер әс-Сыддык хөрмәтенә аталган. Мөфти дин кардәшләре белән намаз укыды һәм изге ай фатихасы турында вәгазь сөйләде.
