(Казан, 25 март, «Татар-информ», Павел Климчак). Казанда Адоратский урамында машина юа торган ике катлы бинада янгын чыккан. Янгын турында хәбәр 14.25 сәгатьтә 101нче янгын сагы номерына килгән. «Янгын мәйданы 150 квадрат метр тәшкил итте», — дип сөйләделәр «Татар-информ»га Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә. Янгында бер кеше дә зыян күрмәгән. Хәзерге вакытта бинада янгын сүндерүчеләр эшли. Шаһитлар бина түбәсе астыннан чыккан куе төтенне видеога төшергән.
