(Апас, 18 декабрь, «Татар-информ», «Апастово-информ» ).«Бердәм Россия» партиясенең җирле бүлеге Апас районы үзәк хастаханәсенең баш табибы Алмаз Алиуллинга яңа ел гирляндалары һәм төрле бизәкләр тапшырды. Бу турыда район басмасы хәбәр итә. Коронавирус инфекциясе белән авыручылар дәваланучы бүлек шушы гирляндалар белән бизәлеп, авыруларның кәефен күтәрәчәк. Кем генә, кая гына булмасын, һәр кешенең күңеле яктылыкка, матурлыкка тартыла бит. «Кеше кая гына булса да, хәтта хастаханәдә дә бәйрәм кәефен татырга, матурлыкны күрергә, могҗизага ышанырга тиеш. Шуңа күрә без, хастаханәнең коронавирус инфекциясе белән чирләүчеләр бүлегенә дә бәйрәм төсе кертергә тырыштык. Шушы кечкенә генә шатлык та — авыруларга үзләренең чирләрен җиңәргә көч өстәсен иде», — диде партиянең җирле бүлеге политсовет вәкиле Луиза Сафина. Моннан тыш, быел да Яңа ел төнендә эшләүче шәфкать туташлар өчен дә котлаулар оештырылачак. Волонтерлар, Кыш бабай, Кар кызы яңа елга хастаханәдә дәвалануда калучыларны да Яңа ел белән котлауны оештырачак.
