(Казан, 16 декабрь, «Татар-информ», Диләрә Галиева). 5G мобиль элемтәнең яңа буыны бик зур мөмкинлекләр бирәчәк һәм ул сәламәтлек өчен куркыныч түгел. Бу хакта онлайн-эфирда Татарстанның Дәүләт идарәсен цифрлы нигездә үстерү, мәгълүмат технологияләре һәм элемтә министры Айрат Хәйруллин хәбәр итте.
«Нурланыш ягыннан борчылырга кирәкми, чөнки Россиядә нурланыш нормалары дөньяда иң катгыйларының берсе. Әгәр Скандинавия илләре белән чагыштырып карасак, бездә кәрәзле элемтә нурланышы нормасы 10 тапкыр катгыйрак һәм АКШ белән чагыштырганда күпкә югарырак. Саннарда бу 1 квадрат метрга 10 микроватт туры килә», - диде Хәйруллин.
Хәзерге вакытта Татарстанда эшли торган 5G манарасы юк, дип искәртте министр.
Элегрәк Татарстанда яшәүчеләрнең Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсенә 5G мобиль элемтәсе турындагы сораулар белән ешрак мөрәҗәгать итүләре билгеле булды.