(Казан, 16 декабрь, "Татар-информ"). Казанда битлек режимын боза торган пассажирлар саны кими — соңгы дүрт көннең һәрберсендә 500дән дә кимрәк хокук бозучы ачыкланган. Бу турыда Казан мэриясе хәбәр итте.
Кичә җәмәгать транспортында автобус, трамвай, троллейбус һәм метро станцияләрендә профилактик рейдлар булды. Шул вакытта шәхси саклану чарасы булмаган 470 пассажирны ачыклаганнар. 469 пассажир кисәтүдән соң битлек кигән, бер кеше шәхси саклану чарасы булмау сәбәпле җәмәгать транспортыннан төшеп калган.
Тикшерүне «Пассажирлар ташуны оештыручы» муниципаль казна учреждениесе контроль-ревизор хезмәте һәм автотранспорт предприятиеләренең контроль хезмәтләре белән берлектә Казан Транспорт комитеты хезмәткәрләре үткәргән, диелә хәбәрдә.