(Казан, 16 декабрь, «Татар-информ»). Бүген Татарстан Президенты Рөстәм Миңнеханов Лаешның үзәк район хастаханәсендә, «Таттехмедфарм» дәүләт челтәре даруханәсендә булды, шулай ук Советлар Союзы Герое Борис Кузнецов исемендәге мәктәптә кайнар ризык белән тәэмин итүне оештыру белән танышты. Бу хакта республика җитәкчесенең матбугат хезмәте хәбәр итә.
«Үзәк район хастаханәсендә Рөстәм Миңнеханов кабул итү бүлеген, ашыгыч ярдәм бүлеген, лабораторияне карады», — диелә хәбәрдә.
Медицина учреждениесе базасында коронавирус белән авыручылар өчен госпиталь оештырылган, пациентлар белән эш җайга салынган. Бу турыда хастаханәнең баш табибы Елена Коробова хәбәр итте.
Рөстәм Миңнеханов медицина хезмәткәрләре белән очрашты һәм хезмәт шартлары, саклагыч костюмнар һәм федераль түләүләр белән кызыксынды. «Хәзерге шартларда сез максималь йөкләнеш белән эшлисез һәм бик мөһим миссия башкарасыз. Рәхмәт сезгә!» — диде ТР Президенты.
Аннары республика җитәкчесе «Таттехмедфарм» дәүләт челтәренең даруханә пунктында булды. Анда аңа медикаментларның җитәрлек булуын, ә коронавирус белән авыручыларга даруларны волонтерлар китерүен әйттеләр.
Шулай ук Рөстәм Миңнеханов Советлар Союзы Герое Борис Кириллович Кузнецов исемендәге 2нче мәктәптә булды. Анда ул кече сыйныф укучыларын бушлай кайнар ризык белән тәэмин итү проектын гамәлгә ашыру белән танышты һәм үзе мәктәп менюсыннан төшке ашны татып карады.