Анталья, Вьетнам һәм Үзбәкстандагы россиялеләр Татарстаннан кайтару рейслары сорыйлар
(Казан, 21 июнь, «Татар-информ», Марат Ишкильдин). Татарстанга россиялеләрне Анталья (Төркия), Вьетнам һәм Үзбәкстаннан кайтаруны сорап мөрәҗәгать итәләр. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның Татарстан буенча идарәсе җитәкчесе урынбасары Любовь Авдонина хәбәр итте.
«Илләр төрле, Бали һәм Индонезиядән рейслар булды, әлегә төрле сәбәпләр аркасында гражданнар бөтен дөнья буйлап кала», — диде спикер.
Гражданнарны алып кайту рейслары планлаштырылган, әмма әлегә ведомствоның аларны башкарырга рөхсәте юк. Мәгълүмат рейс кайтырга бер көн кала билгеле була.