Türkmenistanda halkara ulag maslahaty geçirilýär
BMG-niň howandarlygynda, Türkmenistanyň başlangyjy esasynda guralan foruma 40-a golaý döwletiň, 30-dan gowrak halkara guramasynyň wekiliýetleri gatnaşýar diýip, TDH 15-nji awgustda habar berdi.
Şeýle-de, bu çärä BMG-niň edaralarynyň ýolbaşçylary, abraýly halkara, sebit we sebitara guramalarynyň, maliýe düzümleriniň ýolbaşçylary, hususy ulgamyň, hökümete dahylsyz birleşikleriň, ylmy toparlaryň wekilleri gatnaşýar.
Ministrler maslahatynyň esasy maksady deňze çykalgasy bolmadyk ösüp barýan döwletleriň (DÇBÖBD) durnukly ulag we onuň bilen bagly durnukly ösüş maksatlary ulgamynda gazanan ösüşini seljermekden, şunuň bilen baglylykda, koronawirus ýokanjy pandemiýasynyň we beýleki wehimleriň täsirini kesgitlemekden ybarat diýip, habarda aýdylýar.
Türkmenistan dünýäde COVID-19 wirusy ýokuşan adamlaryň hiç birini resmi taýdan hasaba almadyk az sanly ýurtlaryň biri boldy.
Şeýle-de, öňki prezident Gurbanguly Berdimuhamedowyň dermanlyk ot-çöpler baradaky kitaby esasynda, soňra başga ýurtlarda öndürilen sanjymlary satyn alandygyna garamazdan, Türkmenistanda bu kesele garşy ýüzärlik ýaly ot-çöpler bilen göreşmek maslahat berildi.
Azatlyga ynamdar çeşmelerden gelip gowşan maglumatlara görä, pandemiýa döwründe, ýokanç kesel zerarly dörän saglyk meseleleri sebäpli onlarça müň adam heläk boldy.