NATO şu ýylyň dekabrynda ýörite sammitiň geçiriljekdigini yglan etdi
“Londondaky duşuşyk Ýaranlyga agza ýurtlaryň hökümet we döwlet baştutanlaryna biziň häzirki we gelejekde ýüzbe-ýüz boljak howpsuzlyk meselelerimiz barada çykyş etmäge mümkinçilik döreder. Şeýle-de, olara NATO-nyň 1 milliarda golaý öz ilatynyň howpsuzlygyny üpjün etmek üçin uýgunlaşmaga dowam edýändigini ynandyrmaga mümkinçilik döreder” diýip, Stoltenberg özüniň beýanatynda belleýär.
Stoltenberg transatlantik harby hyzmatdaşlygyň 70 ýyllygyny bellemek üçin britan paýtagtynyň ideal ýerdigini hem aýtdy.
“London NATO-nyň ilkinji baş edarasynyň öýüdi. Beýik Britaniýa Ýaranlygy döreden ilkinji 12 agzanyň biridi we ol biziň umumy howpsuzlygymyza möhüm goşantlary goşmak arkaly häzir hem Ýaranlykda möhüm rol oýnamagyny dowam etdirýär” diýlip, beýanatda aýdylýar.
NATO-nyň düýbüni tutujy akta – Demirgazyk Atlantik Şertnamasy – 1949-njy ýylyň 4-nji aprelinde Waşingtonda gol goýupdy. Şonda oňa Birleşen Ştatlar, Kanada, Britaniýa, Fransiýa, Italiýa, Niderlandlar, Norwegiýa, Daniýa, Portugaliýa, Belgiýa, Islandiýa we Lýuksemburg gol çekipdi.