Паҳлавонони тоҷик дар қаҳрамонии ҷудои Осиё дар Чин 5 медал гирифтанд
Варзишгарони тоҷик дар мусобиқаи инфиродии қаҳрамонии ҷудои Осиё, ки рӯзҳои 16-18-уми апрел дар шаҳри Ордоси Чин баргузор шуд, панҷ медал (ду тило, ду нуқра ва як биринҷӣ) ба даст оварданд.
Аввалин медали тилоро дар қаҳрамонии Осиё дар Ордос Эмомалӣ Нуралӣ дар вазни то 66 кило соҳиб шуд. Вай, ки дар даври аввал озод буд, дар даври дуюм намояндаи Муғулистон Унурбат Ҷантсандоржро шикаст дода, ба нимфинал баромад. Дар ин марҳила Эмомалӣ бар намояндаи мизбон Хуэ Зиянг ғолиб омада, ба финал роҳ ёфт.
Дар даври ниҳоӣ Эмомалӣ Нуралӣ бар ҳамватани худ Обид Ҷебов дастболо шуда, соҳиби медали тило гашт. Ҷебов ба гирифтани медали нуқра ноил гардид. Обид дар роҳ ба финал Ри Кум Сонгро аз Кореяи Шимолӣ, Зардии Казирбекро аз Муғулистон ва Kим Чаннйонгро аз Кореяи Ҷанубӣ мағлуб кард.
Ин аввалин медали тило дар корномаи Эмомалӣ Нуралӣ дар қаҳрамонии Осиё ба ҳисоб меравад. Бояд зикр намуд, Эмомалӣ Нуралӣ пас аз Комроншоҳи Устопириён, ки ду бор дар қаҳрамонии ҷудои Осиё (солҳои 2016 ва 2017) дар Тошканд дар вазни то 90 кило ба унвони қаҳрамони Осиё мушарраф шудааст, дуюмин шуда аз Тоҷикистон дар ин риштаи олимпии варзиш медали тило ба даст овард.
Медали дуюми тилоро дар қаҳрамонии Осиё дар Ордос Муҳиддин Асадуллоев дар вазни то 73 кило гирифт. Ӯ ба сабқат аз даври дуюм пардохт. Паҳлавони ҷавони тоҷик Нурмуҳаммад Бакирдиновро аз Қирғизистон шикаст дода, дар даври чаҳорякниҳоӣ бар Сок Бом Но аз Кореяи Шимолӣ ва дар даври ниманиҳоӣ бар Эункюл Ли аз Кореяи Ҷанубӣ пирӯз шуда, дар финал Маҳмадбек Маҳмадбековро аз Имороти Муттаҳидви Арабӣ мағлуб кард ва бори аввал ба унвони қаҳрамони Осиё даст ёфт. Ин медали чаҳоруми Тоҷикистон дар таърихи қаҳрамонии Осиё ба ҳисоб меравад.
Паҳлавони дигари тоҷик Сомон Маҳмадбеков дар вазни то 81 кило ба гирифтани медали нуқра ноил шуд. Сомон, ки дар даври аввал озод буд, дар даври дуюм Шинебайар Оюнчимеги муғулро шикаст дода, дар даври чаҳорякниҳоӣ бар Гаджидовуд Гасанови баҳрайнӣ дастболо шуд. Сомон дар марҳилаи ниманиҳоӣ намояндаи Имороти Муттаҳидаи Арабӣ Гаджимурод Умаровро шикаст дода, дар финал аз Адилет Алмати қазоқ мағлуб гашт ва соҳиби нишони нуқра гардид.
Мадина Қурбонзода дар сабқати занон дар вазни то 52 кило барои медали биринҷӣ бар Шук Ки Тсул аз Ҳонконг пирӯз шуд. Ин беҳтарин натиҷа миёни бонувони тоҷик дар қаҳрамонии Осиё ба ҳисоб меравад.
Дар ин мусобиқа паҳлавонони тоҷик Абдуллои Ориф дар вазни то 73 кило, Беҳрӯзи Хоҷазода дар вазни то 81 кило, Муҳаммадҷон Абдуҷалилзода дар вазни то 90 кило ва Ҷаҳонгир Маҷидов дар вазни то 100 кило ҷойҳои панҷум, Меҳрзод Суфиев дар вазни то 60 кило ва Виктория Киселёва дар вазни +78 кило ҷойҳои ҳафтумро соҳиб шуданд.
Вале Аҳлия Муъминова дар вазни то 48 кило ва Александра Кан дар вазни то 57 кило дар даври муқаддамотӣ ноком шуда, аз ҳаққи идомаи сабқат маҳрум гаштанд.
Ба иттилои Федератсияи байнулмилалии ҷудо (IJF), дар мусобиқаи инфиродии қаҳрамонии Осиё дар Чин 197 варзишгар (108 мард ва 89 зан) аз 19 кишвари қора иштирок карданд. Ба ҳайати дастаи мунтахаби Тоҷикистон 13 варзишгар (9 мард ва 4 зан) дохил буд.
Пас аз натиҷагирии се рӯзи мусобиқа дар ҳисоби умумидастаӣ мунтахаби Муғулистон бо се медали тило, як нуқра ва як биринҷӣ мақоми аввалро касб намуд.
Мунтахаби Тоҷикистон, ки аввалин бор дар таърихи ширкати худ дар қаҳрамонии Осиё ду медали тило, ду нуқра ва як биринҷӣ гирифт, ҷойи дуюмро соҳиб шуд. Мунтахаби Чин бо ду медали тило, як нуқра ва шаш биринҷӣ дар ҷойи сеюм қарор гирифт.
Ёдовар мешавем, варзишгарони тоҷик дар мусобиқаи қаҳрамонии ҷудои Осиё, ки моҳи апрели соли гузашта дар шаҳри Бангкоки Тайланд баргузор шуд, 7 медал (2 нуқра ва 5 биринҷӣ) ба даст оварда буданд.
Медалҳои нуқраро Сомон Маҳмадбеков (-81 кг) ва Темур Раҳимов (+100 кг) гирифтанд. Муҳаммадсолеҳ Қувватов (-60 кг), Эмомалӣ Нуралӣ, Обид Ҷебов (ҳарду дар вазни - 66 кг), Абубакр Шеров (-73 кг) ва Ҷаҳонгир Маҷидов (-100 кг) бо медалҳои биринҷӣ мукофотонида шуданд.