Мақомоти Тоҷикистону Қирғизистон гуфтанд, ки шаби 10-уми январ дар марзи ду кишвар (байни деҳаи Сомониёни Исфара ва Куктоши Бодканд) муноқиша сар зад. Гуфта мешавад, сангандозии сокинони ду тараф ба сӯи мошинҳои якдигар шабона боис ба сар задани низоъ шудааст. Ҷонибҳо якдигарро муттаҳам мекунанд, ки даст ба тирандозӣ ҳам задаанд.
Нерӯҳои марзбонии Тоҷикистон рӯзи 10-уми январ бо пахши изҳорот шаҳрвандони Қирғизистонро дар сар задани ҳодиса гунаҳкор кард. Хадамоти марзбонии Қирғизистон гуфт, ки афроди номаълум ба сӯи шаҳрвандони Қирғизистон тирпарронӣ карда, сипас дар қаламрави Тоҷикистон паноҳ бурдаанд.
Мақомоти тоҷик мегӯянд, шаҳрвандони Қирғизистон ба сӯи мошинҳои сокинони Тоҷикистон сангпартоӣ карда, баъдан аз силоҳ истифода бурдаанд.
Дар изҳороти нерӯҳои марзбонии Тоҷикистон гуфта мешавад, "шоми 9-уми январ гурӯҳи бузурги сокинони маҳаллаи Кӯктош, ки бо силоҳи шикорӣ мусаллаҳ буданд, ба гузаштани шаҳрвандони Тоҷикистон аз роҳи деҳаи Сомониён монеа эҷод карданд".
"Тахминан соати 21:30 мошинаи тамғаи "Мерседес Бенс"-ро, ки ба сокини деҳаи Хоҷаи Аъло Аъзамов Зафар тааллуқ дорад, сангборон карда, оинаи онро шикастанд. Дар посух ба ин амали иғвогарона, тахминан соати 00.10 дақиқа, сокинони деҳаи Хоҷаи Аъло воситаи нақлиёти қирғизҳоро бо санг заданд", -- гуфта мешавад дар изҳороти нерӯҳои марзбонии Тоҷикистон.
Аммо Хадамоти марзбонии Қирғизистон дар изҳороти худ гуфтааст, шаҳрвандони Тоҷикистон мошинеро дар маҳалли Кочо-Карин сангборон кардаанд. Ин мошин аз Бодканд ба Кӯктош равон буд ва шишаи пеши мошин шикаста шудааст. Сипас, ба иттилои Хадамоти марзбонӣ, "тақрибан соати 2:40 дақиқа шаҳрвандони Тоҷикистон ҳавлии шаҳрванди Қирғизистон дар маҳалли Дахмаро сангборон карданд".
"Марзбононе, ки якҷо бо намояндаҳои сохторҳои қудратӣ ба сӯи манзили шаҳрванди Қирғизистон равон буданд, аз қаламрави Тоҷикистон аз камони шикорӣ тирборон шуданд", -- гуфтаанд дар Хадамоти марзбонии Қирғизистон ва афзудаанд, "тирпарронӣ бо таваққуф ва танҳо аз самти Тоҷикистон сурат мегирифт".
Дафтари матбуотии нерӯҳои марзбонии Тоҷикистон мегӯяд, соати 2-и шаби 10-уми январ сокинони маҳаллаи Куктош аз силоҳи оташфишони ҷангӣ ва шикорӣ ба ҳаво тир холӣ карданд. Инчунин ба гуфтаи мақомоти тоҷик, соатҳои тақрибан 4-и субҳ аз тарафи Қирғизистон бо камони шикорӣ ба мошини шахсии корманди Шӯъбаи корҳои дохилии Исфара Фарҳод Икромзода тирандозӣ шуд.
"Хушбахтона, тир ба дари мошина бархӯрда, ба худи ронанда зарар нарасидааст", -- омадааст дар изҳороти ҷониби Тоҷикистон.
Ҳарду тараф мегӯянд, феълан вазъ дар марз зери назорат аст. Як гурӯҳи тафтишотӣ аз мақомоти ду кишвар ба гуфтаи нерӯҳои марзбонии Тоҷикистон, барои муайян кардани сабабу омилҳои қазия ва шахсияти гунаҳкорон, ба фаъолият оғоз карданд.
Ҷониби Қирғизистон мегӯяд, дар миёни шаҳрвандони Қирғизистон осебдидаҳо ҳастанд ва шишаҳои мошинҳо шикаста шудаанд. Иқбол Илёсзода, сухангӯи ҳукумати шаҳри Исфара дар "Фейсбук" навиштааст, то ҳанӯз дар мавриди осеб дидани шаҳрвандони Тоҷикистон дар ин тирпарронӣ иттилое нарасидааст.
Як сокини деҳаи Сомониёни ҷамоати Чоркӯҳ дар сӯҳбати телефонӣ бо Радиои Озодӣ гуфт, ҳоло маҳалли муноқиша ором аст, вале сокинон аз такрори таниш дар хавотиранд ва канори деҳа ҷамъ омадаанд. Ӯ афзуд, нимашаби гузашта садои тирандозии сахт сокинон сахт парешон кард.
Деҳаҳои Сомониёни Тоҷикистон ва Кук-Тоши Қирғизистон дар ҷамоати Чоркӯҳ канори ҳам ҷойгиранд. Ин ду деҳа аз мавзеъҳои ҳанӯз мушаххаснашудаи сарҳадӣ маҳсуб меёбанд, ки дар он сокинони тоҷику қирғиз канори ҳам зиндагӣ мекунанд ва гоҳу ногоҳ байни сокинон сари соҳиб шудан ба манобеи обу замин, баҳсу муноқишаҳо рух медиҳад. Муноқишаҳо дар марзи Тоҷикистон Қирғизистон, ки асосан байни сокинон сар мезанад дар гузашта чандин кушта барҷой гузоштааст.
Шоҳиди ҳодисае шудед, ё аксе видеое доред, лутфан, ба ин шумораҳо ва ба воситаи Вотсап, Вайбер, Телеграм ва ё ИМО бифристед: (+420) 607 900 808; (+420) 724 056 681; (+420) 724 053 959; (+992) 980 15 10 10