د احمد ظريف چشتي د تدفين مراسم؛ کورنۍ يې هند ته ورځي
د احمد ظریف چشتي د کورنۍ یو شمېر غړي وايي چې هڅه کوي تر ژر تر ژره د هند ویزه واخلي او هلته ته لاړ شي.
خو په هندوستان کې د افغانستان سفارت وايي چې د احمد ظریف چشتي د خاروې سپارولو مراسم یې د کورنۍ د راتک پورې ځنډولي.
د احمد ظربف چشتي چې په صوفي ظریف بابا مشهور وو او د سرطان په څوارلسمه په هند کې ووژل شو ورور يې امید ظریفي وايي هڅه کوي چې په هند کې خاورو ته د هغه د سپارولو په مراسمو کې د ګډون په هدف هغه هېواد ته لاړ شي.
ښاغلي ظریفي له ازادي راډیو سره په خبرو کې د هند له حکومته وغوښتل د ورور د قتل په قضیه کې يې له عدالت کار واخلي.
نوموړي وويل: "موږ چې کله هند ته لاړو بیا خپل ورور خاورو ته سپارو او د خپل ورور مېرمن بیا له ځان سره راولو، که وغوښتل او که ونه غوښتل خپله خوښه یې ده، کله چې یو ځوان مړ شي نو تاسو خپله پوهیږئ چې د کورنۍ حالت یې څنګه وي، موږ عدالت غواړو او دهندوستان له حکومت غواړو چې په دې برخه کې عدالت ټینګ کړي."
۲۸ کلن احمد ظریف چشتي چې په صوفي ظریف بابا مشهور و له تېرو ۴ کلونو راهیسې د هندوستان مبمي ښار ته په ۲ کلیو مترۍ کې په ناشیک سیمه کې ژوند کاوه هغه ځای چې نوموړې په کې څو ورځې وړاندې ووژل شو.
د هندوستان پولیسو ویلي، نوموړی د روانې لمریزې میاشې په ۱۴ مه هغه مهال چې د عبادت له مراسمو خپل موټر خواته روان و د ډریور په ځای کې ناست کس په سر وویشته.
د هندوستان د پولیسو په وینا، ددغه قتل انګېزه د نوموړي له شلو نه تر دېرش میليونه هندي روپۍ پانګه و چې د بل کس په نوم ثبت وه.
د پولیسو په خبره، دغه سرمایه نوموړې له خپلو پلویانو ټوله کړې وه.
د هند د پولیسو د معلوماتو له مخې، احمد ظریف چشتي ددې لپاره چې هغه خپله په هندوستان کې پناه اخیستې وه نهشول کولای په خپل نوم سرمایه او جایداد ولري.
د هندوستان پولیسو ددې پېښې په تړاو د څلور کسانو د نیول کېدو خبر ورکړی.
خو له بلې خوا په هندوستان کې د افغانستان سفارت بیا وايي چې د ښاغلي چشتي مړی یې د کورنۍ په غوښتنه افغانستان ته نه دی لېږلی او په تمه دي چې کورنۍ هند ته ورشي.
ددغه سفارت د رسنیو برخې غړي خیر الله ازاد په دې اړه ازادي راډیو ته وویل: "زموږ نه یې غوښتنه دا ده چې د تدفین مراسم دې ترسره نهشي او هغوی ویلی چې مړې دې ورته افغانستان ته نه ورلیږي تر څو دوی هند ته راشي او هلته یې خاور ته وسپاري، زموږ غوښتنه هم ښکاره ده چې پلټنې دې وشي او عاملین دې د قانون منګلو ته وسپارل شي."
د احمد ظریف چشتي کورنۍ وايي، هغه اصلي د هرات د چشت ولسوالۍ دی او څلور خویندې او یو ورور لري.
خواجه احمد ظریف په دې وروستو کې په ټولنیزو رسنیو په ځانګړي ډول فېسبوک کې د ډېرو افغانانو پام هم ځان ته اړولی و او په ټولنیزو رسنیو کې په ویډوګانو کې لیدل کېده چې هغه ته ډېر کسان د دعا لپاره ورځي.